Ukra'ina urushi ewjige chiqqan bir peytte shi jinping moskwagha yétip keldi

Muxbirimiz erkin
2023.03.20

Ukra'ina urushi ewjige chiqqan, shundaqla xelq'ara jinayi ishlar sot mehkimisi rusiye prézidénti wladimir putinning üstidin tutush buyruqi chiqarghan bir peytte, xitay re'isi shi jinping 20-mart küni rusiye ziyaritini bashlighan. Roytérs agéntliqining xewer qilishiche, xitay re'isi shi jinping shu küni krémil sariyida wladimir putin bilen körüshüp, hem gherbke taqabil turushtiki paydiliq ittipaqdash, dep qaraydighan rusiye bilen iqtisadiy munasiwetni chongqurlashturushni hem béyjingning ukra'ina tinchliq musapisidiki rolini algha sürüshke kirishken.

Shi jinping xelq'ara jinayi ishlar sot mehkimisi ötken jüme küni wladimir pütün üstidin tutush buyruqi chiqirip, uning ukra'inagha qoralliq tajawuz qilghan bir yildin artuq waqittin buyan, ukra'ina balilirini rusiyege yötkesh bilen eyiblishidin béri uning bilen körüshken tunji chet'el rehbiridur. Melum bolushiche, shi jinpingning ziyariti yene xitay, rusiyening ukra'ina urushini qoral-yaraq bilen mexpiy teminlesh bilen eyibliniwatqan, uning teminligen qorallirining ukra'‍ina urush meydanlirida olja élin'ghanliqigha da'ir xewerler tarqalghan bir waqitta élip bérilghan.

Shi jinping bilen pütün kréml sariyida uchrashqanda bir-birige “Qedirlik dostum” dep xitab qilishqan. Shi jinping, wladimir putinning “Küchlük rehberlikide rusiyening muhim muweppeqiyetlerge érishkenliki” ni, rusiye xelqining 2024-yildiki saylamda putinni qayta “Qollishigha ishinidighanliqi” ni éytqan. Putinning qeyt qilishiche, “Xitay iqtisadni rawajlandurushta we döletni kücheytishte intayin ünümlük sistéma yaratqan”.

Xitay rusiye bilen bolghan munasiwitini kücheytken bir waqitta, ukra'ina urushini hel qilishning 12 maddiliq pilanini otturigha qoyghan. Lékin ukra'ina we uning gherb ittipaqdashliri herqandaq bir urush toxtitish rusiyege waqit yaritip bérishi mumkinlikini, rusiye bilen xitayning xelq'ara qanun'gha emel qilishini, rusiyening qoshun chékindürüshini telep qilghan. Roytérs agéntliqining bildürüshiche, krémil sariyi putinning shi jinpinggha rusiyening pozitsiye heqqide tepsiliy chüshenche béridighanliqini éytqan. Xewerde ikki terepning 21-mart küni resmiy söhbet élip baridighanliqi bildürülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.