Ши җинпиң билән путин хитай-русийә оттурисики һәмкарлиқни йәниму чоңқурлаштуруш тоғрилиқ вәдиләшкән

Вашингтондин мухбиримиз ирадә тәйярлиди
2024.05.16

Хитай компартийәсиниң баш секретари ши җинпиң билән русийә пирезиденти виладимир путин 16-май күни бейҗиңда көрүшкән.

“блумберг тори” ниң хәвәр қилишичә, ши җинпиң билән путин икки саәт әтрапида давам қилған учришиштин кейин, бирләшмә баянат елан қилип, икки дөләт оттурисидики һәмкарлиқини йәниму чоңқурлаштурушқа тоғрилиқ вәдиләшкән, шундақла бир қатар келишимләрни имзалиған. Путин билән ши җинпиң 16-майдики учришишта, американи “дуняниң һәр қайси җайлирида башқурулидиған бомба системиси орнитишни пиланлап, русийә вә хитайниң истратегийәлик бихәтәрликигә биваситә тәһдит елип кәлди” дәп әйиблигән. Улар йәнә “американиң бузғунчилиқ вә дүшмәнликлири” гә қарши икки дөләт армийәси арисидики һәмкарлиқни йәниму ашуридиғанлиқини билдүрүшкән.

Хәвәрләргә қариғанда, путин алдинқи һәптә 5-қетим вәзипигә олтурған. У шуниңдин кейинла тунҗи чәт әл зияритини хитайдин башлиған. Бу русийәниң хитайни өзиниң әң йеқин шерики, шундақла украинаға қилған таҗавузчилиқ уруши сәвәблик ғәрб қойған иқтисадий җазадин қутулушниң йоли, дәп қараватқанлиқини көрситип беридикән.

Хитай дөләтлик телевизийә қанили тарқатқан бу һәқтики хәвәрдә, ши җинпиң бейҗиңда путинни күтүвалғанда, “хитай русийә билән яхши қошна, дост вә өз-ара ишинидиған шерик болуш сүпитидә бирликтә ишләшкә тәйяр” дегән. У йәнә путинға “хитай икки дөләт хәлқлири оттурисидики достлуқни әвладму-әвлад мустәһкәмләшкә тәйяр” дегән.

Путин хитайға қаратқан бу қетимлиқ зиярити арқилиқ, хитайниң русийә украинаға таҗавузчилиқ уруши қозғиғандин буян көрсәткән иқтисадий вә дипломатик қоллишини давамлаштурушни капаләткә игә қилишни арзу қилидикән. Һалбуки, америка хитайни русийәниң таҗавузчилиқ урушини қоллашниң еғир ақивәт елип келидиғанлиқи һәққидә агаһландуруп кәлмәктә. Мәлум болушичә, ши җинпиң билән путин 16-май күни кәчтә өткүзүлгән мурасим арқилиқ енергийә, пул муамилә, сүний әқил, аләм тәкшүрүши, һәрбий маневирғичә болған саһәләрдики һәмкарлиқни чоңқурлаштуруш тоғрисида келишим имзалиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.