Америка ширкәт рәһбәрлириниң 40 миң доллар төләп ши җинпиңниң кәчлик зияпитигә қатнишиши талаш-тартиш қозғиди

Вашингтондин мухбиримиз әркин тәйярлиди
2023.11.17

Америкадики даңлиқ ширкәт рәһбәрлириниң 40 миң доллар төләп хитай рәиси ши җинпиңниң сан-франсискода өткүзгән кәчлик зияпитигә қатнишиши америкада талаш-тартиш қозғиди. Америка авам палатаси хитай истратегийәлик риқабәт алаһидә комитети X тики һесабида 40 миң доллар төләп ши җинпиңниң зияпитигә қатнашқан америка ширкәт мәсуллириниң исимлирини ашкарилиди. Мәзкур комитетниң 16-ноябир күни X та елан қилған учурида, зияпәткә қатнашқан америка ширкәт мәсуллири “ирқий қирғинчилиқ қилғучи коммунист ши җинпиңниң кәчлик зияпитигә 40 миң доллар төләп қатнашқан ‛шәрәп меһманлири” дәп тәнқидләнгән.

Мәлум болушичә, зияпәткә қатнашқан даңлиқ америка ширкәт мәсуллириниң ичидә алма ширкитиниң директори тим кук, боең ширкитиниң директори станлей дел, ханейвелниң иҗраийә директори дариус адамжек, бләкстон йәни қараташ ширкитиниң мәсули стефан швартсман, мастеркартиниң иҗра’‍ийә директори мәрит янов қатарлиқ шәхсләр бар икән. Америка таратқулириниң илгирики хәвәрлиридә, буларниң ичидики алма қатарлиқ ширкәтниң илгири америка дөләт мәҗлисидә “уйғур мәҗбурий әмгикиниң алдини қануни” ға қарши паалийәт қилғанлиқи илгири сүрүлгән.

Бу кәчлик зияпәтни америка-хитай мунасивәтлири комитети билән америка-хитай сода кеңиши бирликтә уюштурған. Америка таратқулириниң хәвәр қилишичә, зияпәттә ши җинпиң нутуқ сөзләп, “хитай тәрәп фәнтанилниң америка хәлқигә, болупму яшлириға елип кәлгән зиянкәшликигә чоңқур һесдашлиқ қилиду” дегән. У йәнә өзиниң президент байден билән зәһәргә қарши хизмәт гурупписи қуруп, һәмкарлишишқа келишкәнликини ейтқан. Лекин авам палатаси хитай истратегийәлик риқабәт алаһидә комитетиниң рәиси майк галагер, америка ширкәт мәсуллириниң уйғур мусулманлириға ирқий қирғинчилиқ қиливатқан бир дөләтниң рәһбири билән кәчлик зияпәткә қатнишишини әйиблигән. У америка-хитай сода кеңиши билән америка-хитай мунасивәтлири комитетиға хәт йезип, “америка ширкәтлириниң нәччә миңлиған доллар төләп, шинҗаңдики милйонлиған бигунаһ әр, аял вә балиларға ирқий қирғинчилиқ қилған хитай компартийәсиниң охшаш әмәлдарлири саһибханилиқ қилған күтүвелиш зияпитигә қатнишиши виҗдансизлиқ” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.