Ши җинпиңниң америкадики зиярити күчлүк тәнқидкә учриди

Вашингтондин мухбиримиз ирадә тәйярлиди
2023.11.16

Америка дөләт мәҗлисиниң әзалири хитай дөләт рәиси ши җинпиң билән кәчлик зияпәткә қатнашқан америкалиқ зәрдарларни қаттиқ әйиблиди.

Мәлум болушичә, “америка-хитай сода кеңиши” вә “америка-хитай мунасивәтлири комитети” намлиқ икки орган хитай дөләт рәиси ши җинпиңниң сан-фирансискодики зиярити мәзгилидә униң шәрипигә бир кәчлик зияпәт орунлаштурған. Улар бу зияпәткә қатнишишни арзу қилған ширкәт башқурғучилириға биләт сатқандин сирт, ши җинпиң билән бир үстәлдә олтурмақчи болғанларниң беләт баһасини 40 миң доллар қилип бекиткән.

Америкадики майк гәллигир қатарлиқ сиясийонлар вә башқа көплигән кишилик һоқуқ тәрәпдарлири бу вәқәни күчлүк тәнқидлиди. “америка-хитай истратегийәлик риқабәт пәвқуладдә комитети” ниң рәиси, авам палата әзаси майк гәллигир баянатида, уйғурларға ирқий қирғинчилиқ йүргүзүватқан вә һәмдә еғир кишилик һоқуқ дәпсәндичилики билән шуғуллиниватқан бу һакимийәтниң рәһбири билән ғизалиниш үчүн йәнә мушу һакимийәтниң адәмлири тәрипидин орунлаштурулған зияпәткә қатнашқан америкалиқ тиҗарәтчиләрни қаттиқ әйиблигән. У “X” тики инкасида “силәр ши җинпиң билән бу зияпәттә немә дәп параңлашмақчи? уйғурларға қиливатқан ирқий қирғинчилиқиңиз қандақ кетиватиду, хоңкоңлуқларни оңушлуқ бастурғанлиқиңизни тәбрикләймиз, дәп сөһбәтләшмәкчиму?” дегән.

Мәлум болушичә, ши җинпиң билән бир үстәлдә олтурған ширкәт лидирлириниңму тизимлики елан қилинған болуп, улар алма ширкити, қараташ (BlackRock), әмвәй вә боиң (Boeing) қатарлиқ шеркәтләрни өз ичигә алидикән.

Хитай дөләт рәиси ши җинпиңниң америкадики зиярити кишилик һоқуқ тәрәпдарлириниңму күчлүк тәнқидигә дуч кәлгән иди. Доктор адриян зенз әпәнди радийомизға қилған сөзидә, америка һөкүмитиниң өзи ирқий қирғинчилиқ қиливатиду дәп баһалиған бир дөләтниң рәһбирини күтүвелиши униң кишилик һоқуқ мәсилисидики инавитини төкиду, деди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.