Ши җинпиң җим маттисқа хитайниң "бир суңму" земиндин ваз кәчмәйдиғанлиқини ейтқан

Америка дөләт мудапиә министири җим маттис чаршәнбә күни хитай рәиси ши җинпиң билән көрүшкәндә ши җинпиң хитайниң дуняда қалаймиқанчилиқ чиқармайдиғанлиқини, лекин земин мәсилисидә йол қоймайдиғанлиқини билдүргән. Җим маттисниң зиярити америка-хитай сода мунасивити җиддийлишипла қалмай, икки тәрәпниң җәнубий деңиз, тәйвән мәсилилиридики ихтилапи күчәйгән мәзгилдә елип берилған. Бу униң америка дөләт мудапиә министирлиқ вәзиписигә олтурғандин бери тунҗи қетим хитайни зиярәт қилишидур.

Ройтерс агентлиқиниң хәвәр қилишичә, җим маттис ши җинпиң билән чаршәнбә күни хәлқ сарийида көрүшкәндә ши җинпиң хитайниң тинчлиқни қоғлишидиғанлиқи, униң қалаймиқанчилиқ чиқириш мәқсити йоқлуқини билдүрүп, лекин земин мәсилисидә ваз кәчмәйдиғанлиқини тәкитлигән. У, "биз әҗдадлиримиздин қалған бир суң йәрдинму ваз кәчмәймиз, лекин башқиларниң бир ғерич нәрсисиниму алмаймиз" дегән. Бирақ, ши җинпиңниң "әҗдадлиридин қалған қайси земинлар" ни көздә тутқанлиқи ениқ әмәс. Хитай һөкүмити тибәт, уйғур райони вә тәйвәнниң әзәлдин тартип хитай земини икәнлики, җәнубий деңизниң барлиқ қисмида "тарихий игилик һоқуқи" барлиқини илгири сүрүп, хәлқара сотниң бу һәқтики қарарлирини рәт қилип кәлгән. Хәлқара сот 2016‏-йили хитайниң җәнубий деңизда игилик һоқуқ тәләп қилишиниң "тарихий асаси" йоқлуқини елан қилған иди. 

Ройтерс агентлиқиниң хәвәр қилишичә, җим маттис мухбирларға ши җинпиң билән болған сөһбитиниң "наһайити яхши" өткәнликини тәкитләп, "биз юқири сәвийидики икки тәрәп һәрбий мунасивитиниң муһимлиқида бирдәк тонушқа кәлдуқ" дегән. Җим маттис ши җинпиң билән көрүшүштин бурун хитай дөләт мудапиә министири вей феңхе билән учрашқан. Чәтәл ахбарат васитилириниң хәвәр қилишичә, җим маттисниң күнтәртипидики мәсилиләр шималий корейә, тәйвән вә җәнубий деңиз қатарлиқ мәсилиләрни өз ичигә алидикән.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар