Шималий хитайдикиләр башқа җайлардикиләрдин 3йил бурун өлүп кетидикән

Мухбиримиз җүмә
2017-09-16
Share

Йеқинда елан қилинған бир тәтқиқат нәтиҗисигә қариғанда, шималий хитайниң булғанған шәһәрлиридики кишиләр башқа җайлардикиләргә қариғанда 3 йил бурун өлүп кетидикән.

Бу һәқтики тәтқиқат нәтиҗиси америкидин чиқидиған “PNAS” йәни америка дөләтлик пәнләр академийисиниң илмий журнилида елан қилинған. Униңға қариғанда, иссиниш пар қазанлириға қаланған көмүрләр хитайниң шималида еғир һава булғиниш һадисиси кәлтүрүп чиқиридикән.

Шималий хитайдики булғиниш хитайниң җәнубидики районларға қариғанда 46 пирсәнт еғир болуп, бу шималдики кишиләрниң өмрини җәнубий районлардикигә қариғинида 3.1 Йил қисқартқан.

Өлүмләрниң көпинчиси нәпәс йоли кесәлликлиригә мунасивәтлик икән.

“сода ички хәвәрләр тори” да көрситишичә, хитай даирилири 1950-йили “хуәйхе дәряси сиясити” намлиқ бир сиясәт түзүп чиқип, бу сиясәт бойичә хуәйхе дәрясиниң шималий қисмидики районларни қиш пәслидә иссинишқа бикарлиқ көмүр билән тәминлигән.

Бу сиясәт 1980-йилиғичә йүргүзүлгән. Көмүр көйдүрүш кәлтүрүп чиқарған булғиниш шималий хитайдики 500 милйон адәмгә тәсир көрсәткән.

Америка пәнләр академийисиниң илмий журнилида 2013-йили елан қилинған охшаш доклатта хитайниң шималидики кишиләрниң оттуричә өмри башқа җайлардикиләргә қариғанда 5 йил қисқа болидиғанлиқи, бу районлардики булғинишниң башқа җайларға қариғанда 50 пирсәнт юқирилиқи көрситилгән иди.

Хебей өлкиси хитайниң шималиға җайлашқан вә хитай бойичә булғанған шәһәрләр әң көп районларниң бири.

Әмма, баш штаби лондонға җайлашқан екологийилик муһит хәвәрләр тори - “хитай диалоги” өткән йили июндики бир хәвиридә йеқин кәлгүсидә уйғур ели һавасидики булғиниш дәриҗисиниң хебей өлкисиниң алдиға өтүп кетиши мумкинликини билдүргән.

“йешил тинчлиқ тәшкилати” шу йили 20-апрел елан қилған доклатидиму хитайдики һава булғинишниң ғәрбий шәһәрләргә қарап көчүватқанлиқини, қәшқәр вә хотәнниң хитайдики әң булғанған шәһәрләр тизимликиниң төридин орун алғанлиқини көрсәткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт