“шинҗаңлиқ” хитай милядерниң американиң тексас шитатидин земин сетивелиши күчлүк қаршилиқ қозғиған

“форбес” ториниң хәвәр қилишичә, 2016-йил “гуаңхуй өй-мүлүк ширкити” ниң директори, милядер сун гуаңшинниң америкадики бир тармақ ширкити 110 милйон доллар аҗритип, тексас шитатидин земин сетивалған. Сун гуаңшин бу тармақ ширкити арқилиқ икки йилға йәтмигән вақит ичидә тексас шитатиниң мексика чегрисиға йеқин вал верд наһийәсидин тәхминән 140 миң акр (ингилиз моси) сетивалған болуп, буниңдин 15 миң ингилиз мо йәрни американиң бир шамал ениргийәси еликтир ширкити билән бирлишип еликтир истансиси қурушқа ишләткән, кейин бу електир истансиси текас шитатиниң еликтир ториға қетилған.

2019-Йил сун гуаңшин ток чиқиридиған 46 данә чақпәләкни көпәйтмәкчи болғанда, шу әтраптики аһалиләр вә муһитни қоғдиғучилар униңға қарши чиққан. Бир хитай ширкитиниң шамал ениргийәсии еликтир истансисини контрол қилиши тексасниң еликтир ториға хәвп йәткүзиду, һәтта уни паләч қилип қойиду, дәп қаралған.

Хәвәрдә көрситилишчә, сун гуаңшинниң хитай коммунист һөкүмити билән мунасивити йеқин болуп, униң қолидики гуаңхуй гуруһи үрүмчидики өй-мүлүк базириниң 60 пирсәнтини игилигән вә 10 ға йеқин дөләт карханилирини сетивалған. Хитай һөкүмитиниң йөлиши билән бейиған сун гуаңшин, америкадики тармақ ширкитигә мәхсус һәрбий вә мәмурий хадимларни ишләткән. Бу әһвал тексастики сиясәтчиләрниң диққитини қозғиған, тексас шитатидин болған сабиқ дөләт мәҗлиси әзаси вил һард бу һәқтә мәхсус мақалә йезип, сун гуаңшинниң бу һәрикитидин агаһ болушқа чақирған.

Бу йил 6-айниң 7-күни тексас шитатиниң башлиқи шитат мәҗлиси әзалири билән бирликтә “тәнһа юлтуз ул әслиһә қоғдаш қанун лайиһәси” ни имзалиған болуп, бу қанунниң мәқсити “дүшмән дөләт карханилириниң тексас шитатиниң еликтер тори вә башқа муһим ул әслиһәлирини сетивелишиниң алдини елиш” икән. Бу қанун лайиһәси 6-айниң 18-күни рәсмий қанунға айланған.

Хәвәрдә билдүрүлүшичә, нәччә йилдин бери, хитай һөкүмитиниң хусусий ширкәт қуруп бейиған милядер байлириға бир-бирләп қол селиши хитай байлириниң чәт әлгә қечишиға, әң бурун американи таллишиға сәвәб болған, америкаму буниңдин мәнпәәт еливатқан болсиму, әмма хитай компартийәси беқип сәмриткән сун гуаңшиндәк милядерларниң истратегийәлик җайларни таллап земин сетивелиши вә ул әслиһә қурулушиға мәбләғ селиши, американиң бихәтәрлики вә дөләт мәнпәәтигә зиянлиқ икән.