“Shinjangliq” xitay milyadérning amérikaning téksas shitatidin zémin sétiwélishi küchlük qarshiliq qozghighan

“Forbés” torining xewer qilishiche, 2016-yil “Gu'angxuy öy-mülük shirkiti” ning diréktori, milyadér sun gu'angshinning amérikadiki bir tarmaq shirkiti 110 milyon dollar ajritip, téksas shitatidin zémin sétiwalghan. Sun gu'angshin bu tarmaq shirkiti arqiliq ikki yilgha yetmigen waqit ichide téksas shitatining méksika chégrisigha yéqin wal wérd nahiyesidin texminen 140 ming akr (in'giliz mosi) sétiwalghan bolup, buningdin 15 ming in'giliz mo yerni amérikaning bir shamal énirgiyesi éliktir shirkiti bilen birliship éliktir istansisi qurushqa ishletken, kéyin bu éléktir istansisi tékas shitatining éliktir torigha qétilghan.

2019-Yil sun gu'angshin tok chiqiridighan 46 dane chaqpelekni köpeytmekchi bolghanda, shu etraptiki ahaliler we muhitni qoghdighuchilar uninggha qarshi chiqqan. Bir xitay shirkitining shamal énirgiyesi'i éliktir istansisini kontrol qilishi téksasning éliktir torigha xewp yetküzidu, hetta uni palech qilip qoyidu, dep qaralghan.

Xewerde körsitilishche, sun gu'angshinning xitay kommunist hökümiti bilen munasiwiti yéqin bolup, uning qolidiki gu'angxuy guruhi ürümchidiki öy-mülük bazirining 60 pirsentini igiligen we 10 gha yéqin dölet karxanilirini sétiwalghan. Xitay hökümitining yölishi bilen béyighan sun gu'angshin, amérikadiki tarmaq shirkitige mexsus herbiy we memuriy xadimlarni ishletken. Bu ehwal téksastiki siyasetchilerning diqqitini qozghighan, téksas shitatidin bolghan sabiq dölet mejlisi ezasi wil hard bu heqte mexsus maqale yézip, sun gu'angshinning bu herikitidin agah bolushqa chaqirghan.

Bu yil 6-ayning 7-küni téksas shitatining bashliqi shitat mejlisi ezaliri bilen birlikte “Tenha yultuz ul eslihe qoghdash qanun layihesi” ni imzalighan bolup, bu qanunning meqsiti “Düshmen dölet karxanilirining téksas shitatining éliktér tori we bashqa muhim ul eslihelirini sétiwélishining aldini élish” iken. Bu qanun layihesi 6-ayning 18-küni resmiy qanun'gha aylan'ghan.

Xewerde bildürülüshiche, nechche yildin béri, xitay hökümitining xususiy shirket qurup béyighan milyadér baylirigha bir-birlep qol sélishi xitay baylirining chet elge qéchishigha, eng burun amérikani tallishigha seweb bolghan, amérikamu buningdin menpe'et éliwatqan bolsimu, emma xitay kompartiyesi béqip semritken sun gu'angshindek milyadérlarning istratégiyelik jaylarni tallap zémin sétiwélishi we ul eslihe qurulushigha meblegh sélishi, amérikaning bixeterliki we dölet menpe'etige ziyanliq iken.