Amérikidiki bir aqillar ambirining mes'uli “Xitay agénti” dep eyiblen'gen

Amérikining washin'gton shehiridiki “Yer shari bixeterlik analizi instituti” namliq aqillar ambirining mes'uli gal loft (Gal Luft) “Xitay agénti” dep eyiblen'gen. Roytérs agéntliqining ilgiri sürüshiche, gal loft sabiq amérika pirézidéntining bir meslihetchisini ishlitish we uninggha tapan heqqi bérish bilen eyiblenmekte iken. Roytérs agéntliqi, “Muhapizetchi” géziti qatarliqlarning qeyt qilishiche, amérikining nyu-york shehiri manxaton rayonluq fédératsiye teptish da'irilirining gal loftni tizimgha aldurmighan xitay agénti süpitide heriket qilish, qoral-yaragh we iranning néfitini sétishqa dellalliq qilish bilen eyibligenliki bildürülgen.

Halbuki, amérika teptish emeldarliri eyibnamide gal loft paydilan'ghan sabiq amérika hökümet emeldarining kimlikini ashkarilimighan. Uningda peqet bu kishining eyni waqitta sabiq pirézidént donald trampqa meslihetchi bolghanliqi tekitlen'gen. Roytérs agéntliqining bildürüshiche, nöwette gal loft sabiq pirézidéntning mezkur meslihetchisini xitaygha paydiliq siyasetlerni qollashqa ündesh, jümlidin mezkur meslihetchining namida obzor yézip, bir xitayche gézitte élan qilish bilen eyiblenmekte iken.
Roytérsning xewiridin melum bolushiche, 57 yashliq gal loft bu yil 2-ayda amérikining telipige bina'en siprusta qolgha élin'ghan bolsimu, kapaletke qoyup bérilgendin kéyin qéchip ketken. Amérika teptish emeldarlirining éytishiche, gal loftning qoral sétish ruxsiti bolmisimu, lékin u bir xitay shirkiti bilen liwiye, ereb birleshme xelipiliki, kéniye qatarliq döletler arisidiki qoral sodisigha dellalliq qilghan, shundaqla amérika iran'gha qarita émbargo qoyghan bolsimu, lékin u bir xitay énérgiye shirkiti bilen iran emeldarlirini uchrashturghan iken.