Xénendiki eydiz bimarliri ölkilik hökümet aldida namayish qildi

Radi'omiz igiligen uchurdin melum bolushiche, 23 - aprél seyshenbe küni xénendiki qan bérish sewebidin yuqumlan'ghan eydiz bimarliridin 150 tin artuq kishi, xénen ölkilik hökümet binasi aldigha yighilip, hökümettin ularning dawalash chiqimini we eyni chaghda wede qilin'ghan tölem pulni emeliyleshtürüshni telep qilip namayish qilghan.

Melum bolushiche, seyshenbe küni xénen ölkilik hökümet aldigha yighilghan eydiz bimarliri awal sichüen ya'ende yüz bergen yer tewreshke i'ane toplash namida hökümet binasi aldigha yighilghan. Hökümet emeldarlirining qatnishishini telep qilghan. Eydiz bimarliri uzun saqlighan bolsimu, hökümet emeldarliri ularning aldigha chiqmighandin kéyin, yamghurluq künde pa'aliyetni orunlashturghan eydiz bimarliri “Biz ziyankleshlikke uchrighuchilar. Biz qutquzushqa muhtaj, bizge tölem tölep bérilsun!” dégendek sho'arlarni towlap naraziliq bildürgen.

Radi'omizgha inkas qilghuchilarning bildürüshiche, da'iriler kiseldin mudapi'elinish kiyimi kiygen, qollirigha kaltek we qalqanlarni alghan nechche yüzligen qoralliq saqchilarni ewetip, eydiz bimarlirini meydandin tarqitishqa urun'ghan. Namayishchilar bilen saqchilar arisidiki toqunushta nechche onlighan adem yarilinip, namayish bashchiliridin 5 - 6 nepiri tutqun qilin'ghan.