"Politko" gézitidiki maqalide "Xitay amérika üchün 21-esirdiki eng zor xiris" déyildi

Muxbirimiz irade
2021-01-28
Share

Xitay hökümitining amérikagha we dunyagha her jehettin tehdit peyda qiliwatqanliqi we amérikaning buninggha choqum taqabil turushi kérekliki amérikada baydin hökümiti ishqa chüshken mezgilde boluwatqan eng küchlük munazirilerning biri bolup qaldi.

Shundaq mulahizilerning biri "Politko" gézitining 28-yanwar künidiki sanida élan qilindi. "Xitayning qed kötürüshige taqabil turush üchün, amérika diqqitini shi jinpinggha merkezleshtürüshi kérek" mawzusida yézilghan maqalide "Barghanséri mustebitlishiwatqan xitay amérika 21 – esirde duch kelgen eng muhim xiris", dep teswirlen'gen. Shundaqla "Amérika hökümiti xitaygha ilgiriki herqandaq hökümettin bek zéhnini merkezleshtürüshi kérek" déiyilgen.

"Politko" gézitining éytishiche, bu maqalini bir neper sabiq amérika hökümet emeldari yazghan bolup, u mulahizisining isimsiz élan qilinishini telep qilghaniken.

Aptor maqaliside xitayning iqtisadi we herbiy küchi, téxnika tereqqiyatining sür'iti we uning amérikagha pütünley qarshi bolghan dunya qarishining amérikaning dölet menpe'etige pütünley zitliqini eskertken we: "Bu yéqinqi 20 yilda tedrijiy barliqqa kelgen qurulma xaraktérlik riqabet. Biraq shi jinpingning küchiyishi bu riqabetni zor derijide gewdilendürüp, waqit jedwilini tézletti" dégen.

Maqalide aptor shi jinpingning dölet ichide hakimiyetni mustehkemlep, xitay milletchilikini küchlendürgen bilen bir waqitta Uyghurlargha irqiy qirghinchiliq yürgüzüwatqanliqini bayan qilghan. U ؛ "Shi jinping hakimiyitidiki xitay barghansiri yéngi shekildiki mustebit saqchi dölitige oxshap qaldi, shi jinping özining mustebit tüzümini, mejburlash xaraktérlik tashqi siyasitini we herbiy mewjutluqini öz dölitining chégrasidin halqip dunyagha yüzlendürüshni xalaydighanliqini körsetti", dégen.

Aptor: "Shi jinping amérika üchünla mesile emes. Belki u pütkül démokratik dunyagha éghir xiris élip kéliwatidu" dep agahlandurghan. U buning üchün amérikaning shi jinpinggha qaratqan siyasitige yétekchilik qilidighan bir gewdileshken, her'ikki partiye qollaydighan dölet istratégiyesini tereqqiy qildurushini hazirqi eng jiddiy mesile" dep körsetken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet