FBI Bashliqi xitayni amérikagha kéliwatqan tehditning merkizi, dep körsetken

Washin'gtondin muxbirimiz irade teyyarlidi
2024.04.11

Amérika fédératsiye tekshürüsh idarisi (FBI) ning bashliqi kristofir wréy (Christopher Wray) 9-aprél seyshenbe küni qilghan sözide, xitayni amérikaning dölet bixeterlikige tehdit peyda qiliwatqan eng asasliq küch, dep körsetken.

Kiristofir wréy shu kündiki sözide, döletler bilen baghlinishliq bolghan tehdit guruppilirining amérikaning xewpsizliki we uning muhim halqiliq ul eslihelirige peyda qiliwatqan tehditining barghanséri zoriyiwatqanliqi we murekkeplishiwatqanliqini dégen.

 U mundaq dégen: “Xitay bu tehditlerning aldinqi sépi we merkizi, u bügünki dewrimizdiki roshen tehdittur. Addiy qilip éytqanda, xitay kompartiyesi pütkül hakimiyet küchini dunyaning qanun bilen idare qilinishi, bixeterliki we iqtisadigha buzghunchiliq qilishqa atimaqta” .

Kiristofir wréy shu kündiki sözide yene, xitay peyda qiliwatqan tehditning peqet tor hujumila emes, belki iqtisadiy jasusluq, yaman gherezlik singip kirish, saylamgha arilishish we dölet halqighan basturush ikenlikini, bulargha mas qedemde en'eniwi jasusluq usullirinimu qolliniwatqanliqini, adem küchi toplap amérika karxanilirini nishan qiliwatqanliqini, ichki qisimdikilerdin paydilinip, yéngiliqlarni we sanliq melumatlarni oghrilawatqanliqini bildürgen.

Melum bolushiche, kiristofir wréy 11-april peyshenbe küni yene, amérika dölet mejliside amérikagha kéliwatqan tehditler heqqide doklat béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.