Amérika we en'gliye bazirini igiliwalghan xitay eplirining tik-tok bilen cheklenmeydighanliqi melum boldi

Xitayning tik-tok épi amérikada eng alqishqa érishken dangliq ijtima'iy alaqe supisi bolup, yéqinda bu epning mezmuni, uning xitay kompartiyesi we hökümiti bilen bolghan munasiwiti amérika dölet mejlisining diqqitini qozghighan. Amérika awam palatasi guwahliq yighini ötküzüp, tik-tokning ijra'iye diréktori jow showzini soraqqa tartqanidi.

Lékin yéqinda élan qilin'ghan bir tekshürüsh doklatidin melum bolushiche, tik-tok gherb bazirini, bolupmu amérika we en'gliye bazirini igilewatqan birdin-bir xitay ijtima'iy alaqe supisi emes iken. “Eptopiye” namliq bir tor analiz shirkitining yéqinda élan qilghan bir tekshürüsh doklatida körsitilishiche, tik-toktin bashqa amérikada eng alqishqa érishken aldinqi qatardiki 10 ijtima'iy alaqe supisining ichide yene 3 ep xitay shirkitining igidarchiliqida iken.

Doklatta, bu 3 epning ikkisining en'gliyedimu eng köp yüklinidighan epler ikenliki'i bildürülgen. Doklatta körsitilishiche, bu dangliq 3 ep kapket Cupcat, shé'in Shein we tému Temu qatarliqlarni öz ichige alidiken. Bularning ichidiki shé'in Shein dangliq kiyim-kéchek markisi bolup, uning izdesh matori dunyada eng ishlitiliwatqan eplerning biri iken. Shé'in ilgiri kiyim-kécheklirige Uyghur mejburiy emgikige chétishliq mehsulatlarni ishlitish bilen eyiblen'gen. Amérika “Blumbérg” ‍agéntliqi ötken yili 11-aydiki xewiride, tejribixanidiki d n a tekshürüshidin shé'inning mehsulatlirigha ishletken xam eshyaning “Shinjang paxtisi” ikenliki melum bolghanliqini bildürgen.

Nöwette, emma amérika dölet mejlisi ezaliri we dölet bixeterlik mutexessislirining agahlandurushiche, xitayning igidarchiliqidiki eplerning mexpiyetlik mesilisi mewjut bolup, xitay kompartiyesining bu eplerdiki sanliq melumatlargha érishishi, uninggha dexli-teruz yaki mudaxile qilishi asan iken.