Uyghur aptonom rayonluq hökümet "Shinjang höjjetliri" ni aqlap bayanat élan qilghan

Muxbirimiz erkin
2019-11-28
Élxet
Pikir
Share
Print

Uyghur aptonom rayonluq hökümet 28‏-noyabir bayanat élan qilip, xitayning yéqinda ashkarilan'ghan lagérlar heqqidiki mexpiy höjjitige inkas qayturghan.

Bayanatta mezkur höjjetler inkar qilinmighan we uninggha héchqandaq chüshenche bérilmigen bolup, peqetla mezkur höjjetni ashkarilighan we uni xewer qilghan chet'el taratquliri bilen teshkilatlirini eyibligen.

Bayanatta "Chet'el taratquliri we teshkilatliri atalmish 'shinjang mexpiy höjjetliri' ni bahane qilip, shinjangning 'kespiy maharet terbiyelesh' xizmitini keng dawrang qilmaqta shundaqla shinjangning 'térrorluqqa qarshi turush', 'esebiylikni tügitish' te érishken netijilirige qara chaplimaqta," déyilgen.

24‏-Noyabir küni washin'gtondiki "Xelq'ara tekshürüsh axbaratchiliqi birleshmisi" xitayning lagérdiki tutqunlarni qandaq bashqurush toghrisidiki mexpiy höjjetlirini ashkarilap, xitayni intayin osal ehwalgha chüshürüp qoyghan. Mexpiy höjjette xitayning Uyghur diyari miqyasida qurghan lagérlarning kölimi, lagérlarni qandaq idare qilish, mexpiylikini saqlash, lagérlarni sistémiliq bashqurush usuli we bu siyasetning pütkül Uyghur jem'iyitige körsitiwatqan tesiri qatarliq nurghun tepsilatlar éniq körsitilgen. Mezkur höjjetler xelq'arada qattiq ghulghula qozghighan.

Kishilik hoquqni közitish teshkilati mezkur höjjetlerni "Éniq jinayi pakit" dégen idi. Lékin Uyghur aptonom rayonluq hökümetning bayanatida bu orunlarning "Jaza lagérliri" ikenlikini ret qilip, bu orunlarda "Héchqandaq cheklimining yoqluqi, kishilerning erkinlikini tartiwélishtek xahishlarning mewjut emesliki, kespiy terbiyelesh merkezliridiki oqughuchilarning her xil heq-hoquqlirining qanun boyiche qoghdilidighanliqi" ni ilgiri sürgen. Bayanatta yene bu orunlarda héchqandaq bir chet'el puqrasining terbiyelinip baqmighanliqi, "Shinjangda teqiblesh we alaqe erkinlikini chekleshning mewjut emesliki" tekitlen'gen.

Toluq bet