Xitay armiyesining “Rohiy saghlamliq krizisi” da ikenliki melum bolmaqta

Xitay bilen hindistan we teywen otturisidiki bolghusi toqunushning xewiri köplep melum bolushqa egiship, xitay xelq azadliq armiyesining rohiy jehettiki bir qatar saghlamliq krizisigha duch kéliwatqanliqi ashkarilan'ghan.

Hindistanda neshr qilinidighan köp tirazhliq “Basma” gézitining 19-dékabirdiki xewiride éytilishiche, xitay eskerliri arisida “Rohiy jehettiki jiddiylishish we qorqunch tuyghusi” köpiyishke bashlighan. Bolupmu bu hal xitay bilen alaqidar bolghan herbiy pa'aliyetler we jiddiylik ewj alghan hindistan chégrasi we teywen boghuzi etrapidiki eskerlerde birqeder éghir bolghan.  Ularning bu xil yeküni xitay xelq azadliq armiyesining neshr epkari bolghan “Azadliq armiye géziti” ning yéqinqi sanlirida élan qilin'ghan munasiwetlik doklatlar we maqaliler asasida chiqirilghan. Bu xildiki doklatlarning biri élan qilin'ghan “Jenubiy xitay seher géziti” ning bu heqtiki obzorida “ Eskerlerde ewj éliwatqan rohiy bésim we jiddiylikke taqabil turush üchün  xitay xelq azadliq armiyesi eskerlerge psixikiliq meslihet bérish mulazimitini yolgha qoydi” déyilidu.

Xewerde éytilishiche, “Bir perzentlik a'ililer” de chong bolghan xitay eskerliri toxtawsiz dawam qiliwatqan herbiy orunlashturma, özgirishchan herbiy seperwerlik we qattiq soghuq bolidighan chégra rayonlarda herbiy meshghulat qilish sewebidin izchil dawam qilidighan uzun muddetlik éghir jismaniy pa'aliyetke berdashliq bérelmeslik, shundaqla bu sewebtin chüshkünlük we jiddiylikke giriptar bolushni bashtin kechürüshke bashlighan. Buning bilen eskerler arisida rohiy saghlamliqqa mensup köpligen késellikler ewj élishqa bashlighan.