Хоңкоңниң ахбарат әркинлик көрсәткүчи бу йилму охшашла төвәнлигән

Мухбиримиз ирадә
2016-03-23
Share

Истансимиз хәвири, хоңкоңниң ахбарат әркинлик көрсәткүчи бу йилму охшашла төвәнлигән. Хоңкоңдики журналистларниң ахбарат әркинлик көрсәткүчи тәшкилати” елип барған тәкшүрүш нәтиҗилиридин мәлум болушичә, хоңкоңдики журналистлар вә авам хәлқ һәр иккилиси 2015-йили ичидә “хоңкоңдики ахбарат әркинликидә зор чекиниш болди” дәп қарайдикән. Мутләқ көп қисим журналист өткән бир йилниң хоңкоңда ахбаратчилиқи үчүн әң начар бир йил болғанлиқиға ишинидикән.

Мәзкур тәшкилатниң тор бетидә елан қилинған доклатта, хоңкоң қанунлириниң журналистларни вә ахбарат әркинликини қоғдашта йетәрсиз қеливатқанлиқи тилға елинған.

Доклатта тилға елинған йәнә бир муһим нуқта болса, “мухбирларниң өз-өзини чәкләш” мәсилиси болуп, у асаслиқ хитай компартийәсини тәнқид қилидиған темиларда өз ипадисини тапидикән.

Мәзкур тәшкилатниң муавин башлиқи шерлий ям бу һәқтики сөзидә “бейҗиң һөкүмитини тәнқид қилидиған темиларни ишләштин қорқуш мухбирларниң күндилик нормал хизмитигә тәсир йәткүзмәктә. Қолға елинип кетишни яки чоң қуруқлуққа берип қалса һәтта мушу хоңкоңда турупму башқа келидиған аваричиликләрни нәзәрдә тутқанда, бу һәқиқәтәнму журналистлар үчүн зор бир мәсилә” дегән.

Тәнқидий мәзмундики китабларни сетиш билән тонулған хоңкоңлуқ 5 нәпәр китабпурушниң бир мәзгил йоқап кәткәндин кейин, уштумтутла пәйда болуп, хитай дөләт телевизийәсидә аталмиш “җинайити” ни иқрар қилиш вәқәси хоңкоңда вә шундақла дуняда күчлүк инкас қозғиған иди.

Шерлий ям ханим баянатида мәзкур вәқәни тилға елип, буниң хоңкоңлуқларға көрсәткән қорқунч тәсириниң зор болғанлиқини әскәрткән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт