Xitayning yéngi teyinlen'gen amérikada turushluq bash elchisi washin'gton'gha yétip keldi

Muxbirimiz erkin
2023.05.23

 Xitayning töt aydin béri bosh qalghan amérikada turushluq bash elchilik ornigha xitayning mu'awin tashqiy ishlar ministiri shyé féng teyinlen'gen. “Politiko” gézitining 22-may künidiki xewiride bildürülüshiche, amérika-xitay munasiwetliri intayin keskinliship, imkansiz dewrde turghan bir waqitta bu wezipige qoyulghan shyé féng 23-may seyshenbe küni washin'gton'gha yétip kélidiken. Xitayning amérikada turushluq sabiq bash elchisi chin gang bu yil 1-ayda bash elchilik wezipisidin ayrilip, bu yil 3-ayda xitay tashqi ishlar ministiriliqigha teyinlen'gendin béri, xitayning washin'gtonda turushluq bash elchisining orni bosh qalghan.

 Amérika-xitay munasiwiti dunyadiki eng muhim munasiwet hésablansimu, lékin xitayning 4 aydin béri washin'gton'gha bash elchi ewetmesliki, ikki dölet munasiwitining qanchilik ötkür hem nacharlashqanliqini körsitip béridu, dep qaralghan. Lékin “Politiko” géziti shyé féngning amérika prézidénti baydén amérika-xitay munasiwetlirining “Érishi” mumkinlikini qiyas qilghan bir waqitta washin'gton'gha yétip kelgenlikini bildürgen. Shyé féng bir ke'ispiy diplomat, shundaqla amérika-xitay munasiwetliri mutexessisi bolsimu, lékin uning xitay aliy rehberliri bilen bolghan munasiwiti sabiq bash elchi chin'gangdek qoyuq emes, dep qaralmaqta.

Amérika-xitay munasiwetliri soda, téxnologiye, teywen, jenubiy déngiz, kishilik hoquq, jasusluq shari qatarliq weqeler sewebidin ötkürliship, ikki döletning aliy derijilik uchrishishi ötken yili 11-aydin béri tonglitilghanidi. “Politiko” gézitining éytishiche, shyé féngning mushundaq bir weziyette washin'gton'gha yétip kélishi, xitayning amérika bilen bolghan ixtilapni yumshitishni meqset qilghan bolushi mumkin iken.

Béyjing, prézidént baydénning 22-may küni yaponiyening xiroshima shehiride ötküzülgen sana'etleshken 7 dölet bashliqlirining yighini axirlashqandin kéyin ötküzgen axbarat yighinida, amérika-xitay munasiwetlirining “Qisqa waqitta yumshishi” mumkinlikini qeyt qilishining arqisidinla shyé féngni washin'gton'gha yollighan.  

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.