Хитай ташқи ишлар министири баянатчиси уйғур районидики мәсилиләрни инкар қилған

Мухбиримиз җәвлан
2020-10-21
Share

"хитай хәвәрлири" ториниң 20-өктәбир тарқатқан хәвиригә қариғанда, хитай ташқи ишлар министирлиқиниң баянатчиси җав лиҗийән мухбирларни күтүвелиш йиғинида пакистан өмикиниң уйғур райониға зиярәткә барғанлиқи вә у йәрдә уйғурлар мәсилисини байқимиғанлиқиға қандақ қарайдиғанлиқи һәққидики соалға җаваб берип, пакистанниң "тоғра мәйдани" ни махтиған, шундақла йеқинда 48 дөләтниң б д т 3-комитетида хитайниң уйғурларға қаратқан сияситини қоллиғанлиқини тилға алған. У йәнә 2018-йилдин буян 90 нәччә дөләт өмәклиридин кәлгән миңдин артуқ кишиниң уйғур районини зиярәт қилғанлиқи вә у йәрдики "тинчлиқ, тәрәққият" әһвалини көргәнликини һәмдә хитайниң "террорлуқни йоқитиш тәдбири" ни махтиғанлиқи вә униңдин өрнәк алидиғанлиқини билдүрүшкәнликини, "мәйдани тоғра" затларниң уйғур райониға келип зиярәт қилишини қарши алидиғанлиқини ейтқан.

Мухбир йәнә америка ташқи ишлар министири майк помпейониң хитайниң адәм әткәсчилики билән шуғуллинип, уйғурларни мәҗбурий әмгәккә селиватқанлиқини әйблишигә хитайниң қандақ қарайдиғанлиқи сориғанда, җав лиҗийән йәнила хитай һөкүмитиниң бурундин тәкрарлап келиватқан өктәм, қопал услуби бойичә майк помпейони "ялғанчилиқ вә алдамчилиқни шәрәп дәп билиду; хитайға қарши ялған хәвәрләрни тарқитиду" дәп әйиблигән һәмдә мәҗбурий әмгәк мәсилисиниң мәвҗутлуқини инкар қилған һәмдә хитай һөкүмитиниң намратларни йөләп, уларға иш орни тепип бәргәнликини, американиң болса хитайдики тәрәққиятни чәкләш үчүн хитайдин чатақ тепиватқанлиқи вә хитай завутлириға чәклимә қоюватқанлиқини билдүргән.

Тәһлилчиләрниң қаришичә, уйғур райониға зиярәткә барған өмәкләр асасән б д т кишилик һоқуқ йиғинлирида хитайни қоллиған дөләтләр болуп, пакистан буниң типик үлгиси икән, хитай дәватқан "мәйдани тоғра" затлар әмәлийәттә хитайпәрәс адәмләр яки хитай тәрипидин сетивелинған кишиләр икән.

Уйғур көзәткүчилириниң ейтишичә, хитай баянатчиси җав лиҗйәнниң майк помпейони әйиблигән сөзлири әмәлийәттә хитай компартийәсиниң өзиниң сүпәтлири болуп, хитай компартийиси әзәлдин ялғанчилиқ, алдамчилиқ вә оғрилиқни шәрәп дәп билиду, һөкүмәтниң тәшвиқат васитилири вә баянатчилири арқилиқ тохтимай ялған хәвәрләрни тарқитиду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт