Хитай байлири әнглийәгә көчмән болушқа интилмәктә

Мухбиримиз үмидвар
2015.05.27
Share on WhatsApp
Share on WhatsApp

Өткән йили хитайниң 1500 дин артуқ пулдар бейиниң әнглийәгә мәбләғ салғучи көчмән болуш үчүн илтимас қилғанлиқи мәлум болди.

Әнглийә б б с агентлиқиниң хәвәр қилишичә, хитай пулдарлириниң әнглийәгә мәбләғ салғучи көчмән болуш нисбити йилдин-йилға көпәйгән болуп, 2013-йили, 507 нәпәр пулдар бай көчмәнликкә илтимас қилған болса, 2014-йили, бирақла көпийип 1583 кишигә йәткән.

Мәлум болушичә, хитайда парихорлуқ, чирикликкә қарши һәрикәт алдинқи йиллардикигә қариғанда, йеқинқи бир йил ичидә техиму күчәйгән болуп, көплигән өлкә, муавин өлкә, назир дәриҗилик әмәлдарлар парихорлуқ делолири билән вәзиписидин қалдурулди вә тәкшүрүш астиға елинди. Хитай алий һәрбий-сиясий рәһбәрлик қатлимиға мәнсуп җу юңкаң, шү сәйхо вә башқиларму парихорлуқ вә чириклик қилмиши билән җазаға учриди.

Мәтбуат инкаслирида вә хәвәрлиридә хитай компартийә әмәлдарлири вә пулдар байлириниң пәрзәнтлири, уруқ-туғқанлири вә башқа һәр хил васитиләр арилиқ зор миқдардики пуллири вә байлиқлирини ғәрб дөләтлиригә йөткигәнлики һәм йөткәватқанлиқи көп оттуриға чиққан тема болмақта.

Әнглийә һөкүмити бу дөләткә мәбләғ селип көчмән болуш шәртини илгири аз дегәндә бир милйон фунт стерлиң қилип бәлгилигән болса, йеқинда қанунға өзгәртиш киргүзүп, әң төвән өлчәмни икки милйон фунт стерлиңға көтүргән.

Б б с ниң “қоғдиғучи” гезитидин нәқил елишичә, хитай мәбләғ салғучи көчмәнлириниң виза илтимасиниң тәстиқлиниши 2013-йили 99% кә йәткән болса, көчмән болушни илтимас қилғучиларниң саниниң көпийишигә әгишип уларниң виза елиш нисбити төвәнләп, 85% кә чүшкән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.