Яң җйәнли: "хитайниң б д т хәвпсизлик кеңишигә әза болушиға қарши турайли!"

Мухбиримиз әзиз
2017-10-31
Share

Нөвәттә "пуқралар күчи" тәшкилатиниң рәисликини өтәватқан хитай өктичи зиялийси яң җйәнли америкидики әң чоң гезитләрдин "вашингтон почтиси" да мақалә елан қилип, дунядики демократик дөләтләрни хитайниң бирләшкән дөләтләр тәшкилати (б д т ) хәвпсизлик кеңишигә әза болуштин тосушқа чақирди.

Яң җйәнли мақалисидә хәлқниң сайлишидин өтмигән, шундақла хитай хәлқигә вәкиллик қилалмайдиған бир һөкүмәтниң хәлқарада хитай хәлқиниң ирадисигә вәкиллик қилишқа урунуп кәлгәнликини тәкитлигән.

У бу һәқтә тохтилип "дунядики көплигән дөләтләр хитайниң иқтисадий қудритидин әйминип, инсан һәқлири мәсилисидә хитайға бесим қилалмайватиду. Әмма бу дөләтләр б д т да мүрини мүригә тирәп хитайдики инсан һәқлири хатирисигә қарши турса болиду" дәп көрситиду. Униң пикричә, бу хил усул бу дөләтләрни "хитайниң ички ишиға арилашти" дегән бәтнамдин нери қилалайдикән.

Мақалида көрситилишичә, б д т ниң бәлгилимисидә хәвпсизлик кеңишигә әза дөләтләр җәзмән "инсан һәқлирини қоғдашта үлгилик рол ойниған" дөләтләр болуши лазим икән. Әмма хитайдики сансизлиған инсан һәқлири дәпсәндичилики, җүмлидин уйғурлар вә тибәтләр дуч келиватқан күлпәтләр, уйғур зиялий илһам тохтиниң қамаққа һөкүм қилиниши қатарлиқ әһваллар хитайниң инсан һәқлирини қайси дәриҗидә аяқ асти қиливатқанлиқини көрситип беридиған рошән испатлар икән. Шуңа у дунядики демократик дөләтләрни б д т ниң хәвпсизлик кеңиши сайлимида хитайға беләт ташлимаслиқ, шу арқилиқ хитайни қайта сайлинивелиштин тосушқа чақирған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт