Софи ричардсон: “хитайниң б д т кишилик һоқуқ кеңишигә әза болуши бәкму күлкилик! ”

2023-Йили бирләшкән дөләтләр тәшкилати (б д т) кишилик һоқуқ кеңиши (HRC) гә хитай һөкүмитиниң әза болуп сайлиниши тоғрисидики хәвәрләр оттуриға чиққандин кейин һәр саһәниң күчлүк наразилиқини қозғиди.

 “кишилик һоқуқни көзитиш тәшкилати” хитай бөлүминиң директори софи ричардсон ханим 26-сентәбир күни X (йәни бурунқи тиветтер) да учур йоллап бу һални кәскин тәнқидлиди. Униң учурида мундақ қурлар көзгә челиқиду: “бәзиләр хитай һөкүмитиниң б д т кишилик һоқуқ кеңишигә әза болуп сайлиниши аллиқачан муқимлишип болған иш, дәп қарайду. Әмәлийәттә буниңға сайланмақчи болған намзатлар аз дегәндиму сайлам белитиниң 50 пирсәнтини қолға кәлтүрүши керәк. Инсанийәткә қарши җинайәтләрни садир қиливатқан бундақ бир намзатқа һечқандақ дөләт беләт ташлимаслиқи керәк”.

Кишилик һоқуқ кеңишигә әза болушни йәнә бир қетим тәмә қиливатқан хитай һөкүмити техи йеқиндила уйғурлар вә хоңкоң тәшкилатлириниң кишилик һоқуқ һәққидики муһакимә йиғинлирини тосушқа вә уни чәкләшкә урунуп, һәрқайси ахбарат васитилиридә кәскин тәнқидләргә учриғаниди. Болупму уларниң уйғур қирғинчилиқи түпәйлидин кишилик һоқуқ саһәсидики дәпсәндичиликни қайси дәриҗигә елип барғанлиқи пүтүн дуняға мәлум болғаниди. Әмма хитайниң иқтисадий мәнпәәтни йәмчүк қилиш арқилиқ дуня җамаитини өзигә беқиндуруп кетиши йеқиндин буян көпләп оттуриға чиққанлиқтин, бу һал “пул билән әхлақниң дипломатийә саһәсидики күриши” дәп атиливатқанлиқи мәлум.

Хәвәрләрдә көрситилишичә, 2023-йиллиқ сайлам белити ташлаш 10-өктәбирдә өткүзүлидиған болуп, хитай һөкүмити нөвәттә бу қетимлиқ сайламда утуп чиқиш үчүн паал һәрикәтләрдә болмақта икән.