Хитайдики қариғуларчә кеңәйтилгән санаәтләштүрүш терилғу йәрләрни булғап болған

Хитайда откән 30 йилдин буян қариғуларчә кеңәйтилгән санаәтләштүрүш ичкири өлкиләрдики көпинчә терилғу йәрләрни булғап болған.

“вал стрит журнили” да бу һәқтә берилгән бир тәпсилий хәвәрдә, бу хил терилғу йәрләр “екологийилик балайиапәт бәлвеғи” дәп аталған. Хәвәрдә йәнә, бу хил терилғу йәрләрниң хитайниң ашлиқ тәминатиға тәһдит селипла қалмай, хитай һөкүмитиниң қануний орниғиму тәһдит яритиватқанлиқи көрситилгән.

Хәвәрдә көрситишичә, хунән өлкисиниң дапу йезисидики бир деһқан өзи териған гүрүчләрни зәһәрлинип қелиштин қоруп йейишкә җүрәт қилалмайдиғанлиқини билдүргән.

Чүнки мәзкур йезидики гүрүчләр йеқин әтраптики химийә завути чиқарған керәксиз суларда суғурулидикән.

Бу завут һөкүмәт игидарчилиқида болғачқа деһқанлар гәп қилалмиған.

Хитайда бу хил әһваллар интайин көп учрайдиған болуп, хунәндики дапу йезиси буларниң ичидики кичиккинә бир мисал икән.

Хәвәрдә тәтқиқат нәтиҗилиридин нәқил елип көрситишичә хитайдики терилғу йәрләрниң 20 пирсәнти зәһәрлик металлар билән булғанған болуши мумкин икән.

Униңдин башқа хитайдики терилғу йәрләрниң һәммиси дегүдәк химийилик оғут қалдуқлирида булғанған.

Мәзкур әһвал нөвәттә хитайда ғайәт зор саламәтлик мәсилиси кәлтүрүп чиқарған болуп, бу хитай һөкүмитигә еғир бесимларни елип кәлгән.