Xitaydiki qarighularche kéngeytilgen sana'etleshtürüsh térilghu yerlerni bulghap bolghan

Xitayda otken 30 yildin buyan qarighularche kéngeytilgen sana'etleshtürüsh ichkiri ölkilerdiki köpinche térilghu yerlerni bulghap bolghan.

“Wal strit zhurnili” da bu heqte bérilgen bir tepsiliy xewerde, bu xil térilghu yerler “Ékologiyilik balayi'apet belwéghi” dep atalghan. Xewerde yene, bu xil térilghu yerlerning xitayning ashliq teminatigha tehdit sélipla qalmay, xitay hökümitining qanuniy ornighimu tehdit yaritiwatqanliqi körsitilgen.

Xewerde körsitishiche, xunen ölkisining dapu yézisidiki bir déhqan özi térighan gürüchlerni zeherlinip qélishtin qorup yéyishke jür'et qilalmaydighanliqini bildürgen.

Chünki mezkur yézidiki gürüchler yéqin etraptiki ximiye zawuti chiqarghan kéreksiz sularda sughurulidiken.

Bu zawut hökümet igidarchiliqida bolghachqa déhqanlar gep qilalmighan.

Xitayda bu xil ehwallar intayin köp uchraydighan bolup, xunendiki dapu yézisi bularning ichidiki kichikkine bir misal iken.

Xewerde tetqiqat netijiliridin neqil élip körsitishiche xitaydiki térilghu yerlerning 20 pirsenti zeherlik métallar bilen bulghan'ghan bolushi mumkin iken.

Uningdin bashqa xitaydiki térilghu yerlerning hemmisi dégüdek ximiyilik oghut qalduqlirida bulghan'ghan.

Mezkur ehwal nöwette xitayda ghayet zor salametlik mesilisi keltürüp chiqarghan bolup, bu xitay hökümitige éghir bésimlarni élip kelgen.