Хәлқара киредит баһалаш органи хитайниң киредит дәриҗисини мәнпийгә чүшүрүп қойди

Хәлқара киредит баһалаш органи болған “моди” (Moody) хитай һөкүмитиниң киредит истиқбалини илгирики “муқим” дегән дәриҗидин “мәнпий” яки “турақсиз” дәриҗисигә чүшүргән.

Чәтәл таратқулириниң хәвәр қилишичә, “моди” ниң хитай һөкүмитиниң киредит истиқбалини “мәнпий” гә чүшүрүп қоюшиға униң һөкүмәт қәрзиниң артип кетиш хәвпи сәвәб болған.

Америка CNBC қанилиниң 5-декабир күни бәргән хәвиридә, “моди” бейҗиңниң қийинчилиқта қалған йәрлик һөкүмәтләрни вә дөләт игиликидики карханиларни қутқузуш ярдими униң йиллиқ хам чоти вә иқтисади иқтидарини аҗизлитиду, дәп қарайдиғанлиқини билдүргән.

Хәвәрләрдә, модиниң хитай дөләт зайоминиң киредит дәриҗисини йәнила “A1” йәни оттура һаләтни сақлап қалған болсиму, лекин хитайниң йиллиқ ишләпчиқириш омуми қиммитиниң артиши 2024-йили вә 2025-йиллири 4 пирсәнт, 2026-йилидин 2030-йилғичә 3.8 Пирсәнткә чүшиду, дәп қияс қилғанлиқи қәйт қилинмақта.

“модиниң” пәризигә қариғанда, қурулма характерлик амиллар, җүмлидин аҗиз нопус қурулмиси 2030-йилғичә хитай йиллиқ ишләпчиқириш қиммитиниң 3.5 Пирсәнткә чүшүшиниму кәлтүрүп чиқириши мумкин икән.

“моди” 5-декабир өктәбир елан қилған баянатида, өз қарариниң бейҗиңниң йәрлик һөкүмәтләр вә өй мүлүк ширкәтлириниң барғансери ешиватқан қәрз киризисини контрол қилиш үчүн уларға малийә ярдими бериши, униң қәрз миқдари вә иқтисадиниң өсүшигә болған әндишилирини ипадиләйдиғанлиқи тәкитләнгән.

Рейтерс агентлиқиниң йеқинда ашкарилишичә, хитай һөкүмити дөләт банкилириға йәрлик һөкүмәтләрниң қәрзини төвән өсүмдики узун муддәтлик киредитқа өзгәртишни ейтқан. Хәвәрдә, хитайдики йәрлик һөкүмәтләрниң қәрзи бу йил 10-айда 12 тириллийон 580 милярд долларға йетип барғанлиқи қәйт қилинмақта.

Чәтәлләрдики мустәқил хитай таратқулириниң илгири сүрүшичә, хитай рәиси ши җинпиңниң бу йил 8-айда җәнубий африқидин қайтиш сәпиридә туюқсиз үрүмчидә тохтап өтүшидики сәвәбму йәрлик һөкүмәтләрниң қәрз киризисиниң “шинҗаңға нишанлиқ ярдәм бериш программиси” ға хирис қилиши билән мунасивәтлик икән.