Xelq'ara kirédit bahalash organi xitayning kirédit derijisini menpiyge chüshürüp qoydi

Xelq'ara kirédit bahalash organi bolghan “Modi” (Moody) xitay hökümitining kirédit istiqbalini ilgiriki “Muqim” dégen derijidin “Menpiy” yaki “Turaqsiz” derijisige chüshürgen.

Chet'el taratqulirining xewer qilishiche, “Modi” ning xitay hökümitining kirédit istiqbalini “Menpiy” ge chüshürüp qoyushigha uning hökümet qerzining artip kétish xewpi seweb bolghan.

Amérika CNBC qanilining 5-dékabir küni bergen xewiride, “Modi” béyjingning qiyinchiliqta qalghan yerlik hökümetlerni we dölet igilikidiki karxanilarni qutquzush yardimi uning yilliq xam choti we iqtisadi iqtidarini ajizlitidu, dep qaraydighanliqini bildürgen.

Xewerlerde, modining xitay dölet zayomining kirédit derijisini yenila “A1” yeni ottura haletni saqlap qalghan bolsimu, lékin xitayning yilliq ishlepchiqirish omumi qimmitining artishi 2024-yili we 2025-yilliri 4 pirsent, 2026-yilidin 2030-yilghiche 3.8 Pirsentke chüshidu, dep qiyas qilghanliqi qeyt qilinmaqta.

“Modining” perizige qarighanda, qurulma xaraktérlik amillar, jümlidin ajiz nopus qurulmisi 2030-yilghiche xitay yilliq ishlepchiqirish qimmitining 3.5 Pirsentke chüshüshinimu keltürüp chiqirishi mumkin iken.

“Modi” 5-dékabir öktebir élan qilghan bayanatida, öz qararining béyjingning yerlik hökümetler we öy mülük shirketlirining barghanséri éshiwatqan qerz kirizisini kontrol qilish üchün ulargha maliye yardimi bérishi, uning qerz miqdari we iqtisadining ösüshige bolghan endishilirini ipadileydighanliqi tekitlen'gen.

Réytérs agéntliqining yéqinda ashkarilishiche, xitay hökümiti dölet bankilirigha yerlik hökümetlerning qerzini töwen ösümdiki uzun muddetlik kiréditqa özgertishni éytqan. Xewerde, xitaydiki yerlik hökümetlerning qerzi bu yil 10-ayda 12 tirilliyon 580 milyard dollargha yétip barghanliqi qeyt qilinmaqta.

Chet'ellerdiki musteqil xitay taratqulirining ilgiri sürüshiche, xitay re'isi shi jinpingning bu yil 8-ayda jenubiy afriqidin qaytish sepiride tuyuqsiz ürümchide toxtap ötüshidiki sewebmu yerlik hökümetlerning qerz kirizisining “Shinjanggha nishanliq yardem bérish programmisi” gha xiris qilishi bilen munasiwetlik iken.