Хитай ташқий сиясәттики “урушқақ бөрә” дипломатийәсини өзгәртип, юмшашқа башлиған

Ковид-19 вирусиниң искәнҗисидә қалған вә ‍иқтисади начарлишишқа қарап маңған хитай, өзиниң “урушқақ бөрә” дипломатийәсини өзгәртип, ташқий сиясәттә юмшақ дипломатик тил қоллинишқа, ‍иқтисадий һәмкарлиқ вәдиси беришкә башлиған. “политика” гезитиниң билдүрүшичә, хитайниң муавин ташқий ишлар министири лю хе бу һәптә шивитсарийәниң давос шәһиридә йәр шари сиясий вә сода сәрхиллириниң йиллиқ йиғиниға қатнишип, техиму юмшақ вә достанә ипадидә болған.

Хәвәрдә, лю хениң “хитайниң реаллиқи дуняға ечиветишниң бир вастә әмәс, бир зөрүрийәт икәнликини бәлгилигән. Биз техиму кәң ечиветишимиз вә буни техиму яхши қилишимиз керәк” дегәнлики алаһидә тәкитләнгән.

Лекин “политика” гезитиниң ейтишичә, ғәрб әмәлдарлири бу сигналға диққәт қилған болсиму, бирақ улар буниң маһийәтлик бир өзгиришниң ипадисидин бәкрәк дипломатик ялтирақ болушидин гуман қилмақта икән. Хәвәрдә ғәрб әмәлдарлириниң хитайниң бу сигналиға қаримай, униң ‍изчил күчийиватқан иқтисадий вә һәрбий тәһдитигә йәнила тәмкинлик билән муамилә қиливатқанлиқини билдүргән.

Хәвәрдә көрситишичә, хитайниң һәркити униң нәччә йилдин буянқи “урушқақ бөрә” дипломатийәси, тәйвән боғузидики һәрбий тәһдити, һинди-тинч окран районидики урушқақ һәрбий мудахилиси, ‍иқтисадий зорлаш, юқири техникилиқ җасуслиқ һәркити кәлтүрүп чиқарған зиянларни толуқлашни мәқсәт қилмақта икән.

Хәвәрдә, хитай ташқий сиясасәттә юмшақ сигнал беришкә башлиған болсиму, лекин хитайниң һәркити билән сөзиниң бирдәк болмаслиқи униң нийитигә гумән пәйда қилғанлиқи билдүрүлгән. Хәвәрдә ейтишичә, хитайниң украина урушида йәнила русийәгә йеқин туруши, хитай уруш айропиланлириниң тәйвәнгә қәрәллик тәһдит селиши, уйғурларға қилинған зиянкәшлик дәлилләнгән болсиму, лекин буни давамлиқ инкар қилиши қатарлиқ мәсилиләр униң нийитигә суал қоймақта икән.