Xitay tashqiy siyasettiki “Urushqaq böre” diplomatiyesini özgertip, yumshashqa bashlighan

Kowid-19 wirusining iskenjiside qalghan we ‍iqtisadi nacharlishishqa qarap mangghan xitay, özining “Urushqaq böre” diplomatiyesini özgertip, tashqiy siyasette yumshaq diplomatik til qollinishqa, ‍iqtisadiy hemkarliq wedisi bérishke bashlighan. “Politika” gézitining bildürüshiche, xitayning mu'awin tashqiy ishlar ministiri lyu xé bu hepte shiwitsariyening dawos shehiride yer shari siyasiy we soda serxillirining yilliq yighinigha qatniship, téximu yumshaq we dostane ipadide bolghan.

Xewerde, lyu xéning “Xitayning ré'alliqi dunyagha échiwétishning bir waste emes, bir zörüriyet ikenlikini belgiligen. Biz téximu keng échiwétishimiz we buni téximu yaxshi qilishimiz kérek” dégenliki alahide tekitlen'gen.

Lékin “Politika” gézitining éytishiche, gherb emeldarliri bu signalgha diqqet qilghan bolsimu, biraq ular buning mahiyetlik bir özgirishning ipadisidin bekrek diplomatik yaltiraq bolushidin guman qilmaqta iken. Xewerde gherb emeldarlirining xitayning bu signaligha qarimay, uning ‍izchil küchiyiwatqan iqtisadiy we herbiy tehditige yenila temkinlik bilen mu'amile qiliwatqanliqini bildürgen.

Xewerde körsitishiche, xitayning herkiti uning nechche yildin buyanqi “Urushqaq böre” diplomatiyesi, teywen boghuzidiki herbiy tehditi, hindi-tinch okran rayonidiki urushqaq herbiy mudaxilisi, ‍iqtisadiy zorlash, yuqiri téxnikiliq jasusliq herkiti keltürüp chiqarghan ziyanlarni toluqlashni meqset qilmaqta iken.

Xewerde, xitay tashqiy siyasasette yumshaq signal bérishke bashlighan bolsimu, lékin xitayning herkiti bilen sözining birdek bolmasliqi uning niyitige gumen peyda qilghanliqi bildürülgen. Xewerde éytishiche, xitayning ukra'ina urushida yenila rusiyege yéqin turushi, xitay urush ayropilanlirining teywen'ge qerellik tehdit sélishi, Uyghurlargha qilin'ghan ziyankeshlik delillen'gen bolsimu, lékin buni dawamliq inkar qilishi qatarliq mesililer uning niyitige su'al qoymaqta iken.