Хитай һөкүмити уйғур районидики милләтләрни ишқа орунлаштурушқа «йүксәк дәриҗидә әһмийәт бәргәнлики» һәққидә доклат елан қилған

Мухбиримиз җәвлан
2020-10-21
Елхәт
Пикир
Share
Принт

«Хитай хәвәрлири» ториниң 21-өктәбир елан қилған хәвиридә билдүрүлүшичә, шинҗаң тәрәққият тәтқиқат мәркизи 20-өктәбир «шинҗаңдики аз санлиқ милләтләрниң ишқа орунлишишини тәкшүрүш доклати» ни елан қилған болуп, «буниңдин шинҗаң уйғур аптоном райони һөкүмитиниң аз санлиқ милләтләрниң ишқа орунлишиши мәсилисигә йүксәк дәриҗидә әһмийәт бәргәнликини, һәр милләт хәлқниң ишқа орунлишиш арзусиға һөрмәт қилип, уларни мулазимәтни нишан қилған иш орниға тәшкиллик һалда орунлаштурғанлиқини көрүвалғили болиду» дейилгән.

Хәвәрдә йәнә, ғәрб әллиридики бәзи әқил амбири органлириниң уйғур районида кәң-көләмлик мәҗбурий әмгәк мәсилиси бар дегән доклати һәмдә бәзи сиясийонларниң уйғур районидики мәҗбурий әмгәк мәсилисини оттуриға қойғиниға қарши һалда шинҗаң тәрәққият тәтқиқат мәркизиниң мәхсус мутәхәссисләрни тәклип қилип, уйғур дияридики әмгәкчиләрниң ишқа орунлишиш әһвалини тәкшүрүшкә уюштурғанлиқи билдүрүлгән болуп, бу «тәкшүрүп тәтқиқ қилиш гурупписи» уйғур дияриниң һәр қайси җайлирида тәкшүрүш елип бериш арқилиқ һечқандақ җайда мәҗбурий әмгәк мәсилисиниң йоқлуқини, һәр милләт аммисиниң өз ихтиярлиқи билән ишқа орунлашқанлиқини, һөкүмәтниң уларға «ишләш, кәсип таллаш, игилик тикләш әркинлики» бәргәнликини дәлилләп чиққан.

Бу доклатта йәнә бәзи санлиқ мәлуматлар берилгән болуп, «2014-йилдин 2019-йилғичә шинҗаңда кәсип җәһәттин тәрбийәләнгәнләр 6 милйон 957 миң адәм қетимға, игилик тиклигүчиләр 379миң 400 адәмгә йәтти. Һөкүмәтниң ярдими билән шинҗаңдики ешинча әмгәк күчлиридин район атлап ишқа орунлашқанлар 16милйон 570 миң адәм қетимға йәтти, буниң ичидә җәнубий шинҗаңдин ишқа орунлашқанлар 10милйон 700 миң адәм қетимға йәтти» дейилгән.

Анализчиларниң қаришичә, хитайниң бу «тәкшүрүш доклати» дики санлиқ мәлуматта уйғурларниң сани ениқ әмәс, униң тоғрилиқини үчинчи тәрәп испатлиялмайду, ишқа орунлашқанларниң көпинчисиниң хитай көчмәнлири икәнликини чәткә қаққили болмайду. Хитай һәр даим өзиниң қилмишини өзи ақлап, һәтта уни «илмий пакит» билән ниқаплашқа уста. Йәнә бир җәһәттин, бу доклат уйғур районидики лагерлар вә мәҗбурий әмгәк мәсилиси хәлқараға ашкариланғандин кейин хитайға хәлқарадин, болупму америкадин бесим болуватқанлиқиниң ипадиси болуп, америкада мақуллиниш алдида турған «уйғур мәҗбурий әмгәкниң алдини елиш қануни» ға қарши һалда оттуриға чиққан тәшвиқаттин ибарәт.

Пикирләр (0)
Share
Толуқ бәт