Dora kemchilliki xitaydiki eng chong bash aghriqi bolup qalghan

Muxbirimiz eziz
2022.12.20

Xitayda ghayet zor kölemlik wirus wabasi yamraydighanliqi melum bolghandin buyan qizitma qayturush dorisi qatarliq dorilarning bahasi nechche hesse örlepla qalmastin pütkül xitaydiki dorixanilarda “Qurup ketken”.

 Buning bilen xongkong we teywendiki xitaylar bes-beste özliri turushluq jaylardin bu xildiki dorilarni sétiwélip xitaydiki uruq-tughqanlirigha we dostlirigha ewetishke bashlighan.
“Nyu-york waqti géziti” ning 20-dékabirdiki xewiride éytilishiche, xitaydiki milyonlighan kishiler zukam dorisidin tartip qizitma qayturush dorisighiche bolghan dorilarning yétishmesliki tüpeylidin patiparaqchiliqqa chüshüp qalghan. Xitay hökümiti bolsa téxi yéqinqi mezgillergiche “Wirusning nölge chüshkenliki” heqqidiki teshwiqatni dawam qildurup kelgenliki üchün puqralar arisida yéterlik teyyarliqmu bolmighan. Emdilikte bolsa hökümet da'irilirining “Yéngi wirus wabasini kontrol qilish qiyin bolup, uning aqiwiti mölcherligüsiz derijide éghir bolushi mumkin” dégen sözliri ashkara élan qilin'ghandin kéyin bu xil qorqunch téximu köp kishilerni endishige salghan. Di'ana (Diane Ye) Isimlik bir xitay yash muxbirlargha özining wirus bilen yuqumlan'ghanliqini, emma doxturxana sirtida birnechche sa'et uzun Öchirette Turghandin kéyin doxturlarning “Qizitma qayturush dorisi tügep ketti” dégen seweb bilen öyge qaytishni buyrughanliqini éytqan.

Xitay hökümiti 7-dékabirda qamal siyasetlirini boshatqanliqini élan qilghandin buyan Jem'iy Yette kishining wirustin ölgenlikini éytqan bolsimu, ijtima'iy taratqulardiki uchurlar Emeliy Sanning bu sandin mutleq köp ikenlikini körsetken. Yene kélip dunya boyiche qizitma qayturush dorisi, zukam dorisi qatarliqlarning üchtin biri xitayda ishlepchiqirilidighan bolsimu éhtiyajning birdinla ghayet zor derijide éshishi tüpeylidin bu dorilarni pul xejlepmu tapqili bolmas bolup ketken. Béyjingdiki bir dorixanida ishleydighan jang famililik bir xitay “Qamalni boshitidighan adem buni baldurraq démemdu? bundaq tuyuqsiz qamalni bikar qilish tüpeylidin héchkimmu teyyarliq qilip ülgürelmigen” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.