Җамаәт хәвпсизлик назаритиниң муавини ши хүйниң хиянити 100 милйон сомдин ашқан

Мухбиримиз ирадә
2017-03-23
Share

2015-Йили “интизамға еғир хилаплиқ қилиш” гумани билән вәзиписидин тохтитип қоюлған уйғур аптоном районлуқ җамаәт хәвпсизлик назаритиниң сабиқ муавин назири ше хүйниң қанунсиз йоллар арқилиқ тапқан пули йүз милйондин ошуқлуқи мәлум болған.

Бүгүн, җуңго хәвәрләр тори қатарлиқ тор бәтләр хәвәр тарқитип, ше хүйниң уйғур елидики җамаәт хәвпсизлик назарити муавини, аптоном районлуқ әмгәк билән өзгәртиш идариси вә түрмә башқуруш идариси қатарлиқ органларда партком секретари вә идарә башлиқи болған мәзгилләрдә һоқуқини суйиистемал қилип, қурулуш һөддигә бериш ишлириға арилишип пайда елиш, башқилардин зор миқдарда пара елиш, совғат қобул қилиш арқилиқ қанунсиз мал-дуня йиғқанлиқини билдүргән.

Хәвәрдин қариғанда, ше хүйниң болупму түрмә башқуруш идарисидә ишлигән мәзгили униң парихорлуқ қилишиға әң қулай шараит яритилған бир мәзгил болған болуп, хитай мәтбуатлири униң қилмиши вә йиғқан 100 милйон сом пулиниң миқдариға қарап туруп, униң интизамға хилап һәрикәтлири “кишини чөчүтидиған” дәриҗидә еғир, дәп баһалиған.

Уйғур ели хитай әмәлдарлириниң парихорлуқ қилмиши әң еғир җайларниң бири, дәп қарилип кәлгән. Чәтәлләрдики уйғур көзәткүчиләр ши хүйниң делосини буниң йәнә бир испати, дәп көрситиш билән биргә, буни хитай һөкүмитиниң уйғур елидики муқимлиқни сақлаш баш нишан қилинған сияситиниң нәтиҗиси, дәп қаримақта.

Ше хүй 2015-йили 7-айда вәзиписидин тохтитилип тәкшүрүшкә елинғандин кейин 2016-йили 1-айда рәсмий қолға елинған икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт