“шинҗаң гезити” ниң сабиқ партком секретари җав шиңвей тәкшүрүшкә елинди

Уйғур елидики компартийә авази һесаблинидиған “шинҗаң гезити” идарисиниң сабиқ партком секретари, баш муһәрири җав шиңвей партийә интизамиға еғир дәриҗидә хилаплиқ қилиш гумани билән тәкшүрүшкә елинған.

Хәвәрдә униң интизамға қандақ хилаплиқ қилғанлиқи ениқ тилға елинмиған болсиму, әмма көзәткүчиләр буниң парихорлуқ вә чирикликкә мунасивәтликликини билдүрмәктә.

Хәлқ ториниң хәвиридин қариғанда, җав шиңвей әслидә шәншилик болуп, у 1986-йили уйғур елиға көчүп кәлгән. У бу җәрянда қәшқәр вилайәтлик һөкүмәт ишханисида катиб, бөлүм башлиқи, вилайәтлик парткомниң даимий әзаси, қәшқәр вилайәтлик партком тәшвиқат идарисиниң башлиқи қатарлиқ вәзипиләрни өтигән.

Җав шиңвей 2011-йилидин бу йил 4-айғичә шинҗаң гезитигә партком секретари болуп турған. Җав шиңвейниң мәсилисиниң униң қәшқәрдә әмәлдар болуп турған мәзгили билән көпрәк алақиси болуши мумкинлики мөлчәрләнмәктә. Хитай даирилири техи йеқинда уйғур елидики “фули латарийә мәркизи”ниң башлиқи болған йин миңкүйни парихорлуқ җинайити билән қолға алған иди.