Биңтуәнниң сабиқ муавин қомандани яң фулин сотқа тартилған

Хитайниң уйғур елида турушлуқ ишләпчиқириш-қурулуш биңтуәниниң сабиқ муавин қомандани, биңтуән парткоминиң сабиқ даимий һәйити, биңтуән сиясий-қанун комитетиниң сабиқ секритари яң фулин парихорлуқ билән әйиблинип сотланған.

“хитай хәвәрләр тори” ниң бүгүнки хәвиригә қариғанда, яң фулин җәмий 30 милйон 490 миң йүәндин артуқ пара алған, дәп әйибләнгән. Униң тунҗи мәйдан соти 9-айниң 8-күни, шәндуң өлкиси җинән шәһәрлик оттура хәлқ сот мәһкимисидә ечилған.

Хәвәрдә шинҗаң ишләпчиқириш-қурулуш биңтуәниниң сабиқ муавин қомандани, биңтуән парткоми даимий комитетниң сабиқ әзаси, биңтуән сиясий-қанун комитетиниң сабиқ секритари болған яң фулинниң алақидар орунлар вә шәхсләргә берилгән қурулуш түри һөддигәрлики, сиясий қанунға даир делоларни бир тәрәп қилиш қатарлиқ ишларда зор соммида пара алғанлиқи, униң алған парисиниң 30 милйон 490 миң йүәндин ешип кәткәнлики хәвәр қилинған.

Хитайниң уйғур районидики йерим һәрбий характерлиқ өлкә дәриҗилик органи болған шинҗаң ишләпчиқириш-қурулуш биңтуәни хитай һөкүмитиниң 2017-йилидин башлап уйғур елида елип барған кәң көләмлик тутқун вә лаеирға қамаш шундақла мәҗбурий әмгәк сияситини иҗра қилишта таянчилиқ ролини ойниған иди. Шу сәвәбтин америка һөкүмити 2020-йили шинҗаң ишләпчиқириш-қурулуш биңтуәни вә униң йоқири дәриҗилик рәһбәрлиригә, шундақла биңтуәнгә қарашлиқ бәзи чоң ширкәтләргә җаза тәдбири елан қилған иди.

Яң фулин 2013-йилидин таки у “сиясий интизамға вә қанунға еғир дәриҗидә хилаплиқ қилиш” җинайити билән әйиблинип қолға елинған 2021-йили 12-айғичә болған арилиқта, биңтуәнниң сиясий-қанун саһәсини контрол қилип кәлгән йоқири дәриҗилик хитай әмәлдар иди. яң фулинниң биңтуән сиясий-қанун комитетиниң сабиқ секритари болуш сүпити билән 2017-йилидин буян хитайниң уйғурларға қаратқан кәң көләмлик тутқун, лагерларға қамаш вә мәҗбурий әмгәк қатарлиқ ирқий қирғинчилиқ җинайәтлиридә баш тартип болалмайдиған мәсулийити барлиқи мөлчәрләнмәктә.