Bingtu'enning sabiq mu'awin qomandani yang fulin sotqa tartilghan

Muxbirimiz irade
2022.09.08
Share on WhatsApp
Share on WhatsApp

Xitayning Uyghur élida turushluq ishlepchiqirish-qurulush bingtu'enining sabiq mu'awin qomandani, bingtu'en partkomining sabiq da'imiy hey'iti, bingtu'en siyasiy-qanun komitétining sabiq sékritari yang fulin parixorluq bilen eyiblinip sotlan'ghan.

“Xitay xewerler tori” ning bügünki xewirige qarighanda, yang fulin jem'iy 30 milyon 490 ming yüendin artuq para alghan, dep eyiblen'gen. Uning tunji meydan soti 9-ayning 8-küni, shendung ölkisi jinen sheherlik ottura xelq sot mehkimiside échilghan.

Xewerde shinjang ishlepchiqirish-qurulush bingtu'enining sabiq mu'awin qomandani, bingtu'en partkomi da'imiy komitétning sabiq ezasi, bingtu'en siyasiy-qanun komitétining sabiq sékritari bolghan yang fulinning alaqidar orunlar we shexslerge bérilgen qurulush türi höddigerliki, siyasiy qanun'gha da'ir délolarni bir terep qilish qatarliq ishlarda zor sommida para alghanliqi, uning alghan parisining 30 milyon 490 ming yüendin éship ketkenliki xewer qilin'ghan.

Xitayning Uyghur rayonidiki yérim herbiy xaraktérliq ölke derijilik organi bolghan shinjang ishlepchiqirish-qurulush bingtu'eni xitay hökümitining 2017-yilidin bashlap Uyghur élida élip barghan keng kölemlik tutqun we laéirgha qamash shundaqla mejburiy emgek siyasitini ijra qilishta tayanchiliq rolini oynighan idi. Shu sewebtin amérika hökümiti 2020-yili shinjang ishlepchiqirish-qurulush bingtu'eni we uning yoqiri derijilik rehberlirige, shundaqla bingtu'en'ge qarashliq bezi chong shirketlerge jaza tedbiri élan qilghan idi.

Yang fulin 2013-yilidin taki u “Siyasiy intizamgha we qanun'gha éghir derijide xilapliq qilish” jinayiti bilen eyiblinip qolgha élin'ghan 2021-yili 12-ayghiche bolghan ariliqta, bingtu'enning siyasiy-qanun sahesini kontrol qilip kelgen yoqiri derijilik xitay emeldar idi. Yang fulinning bingtu'en siyasiy-qanun komitétining sabiq sékritari bolush süpiti bilen 2017-yilidin buyan xitayning Uyghurlargha qaratqan keng kölemlik tutqun, lagérlargha qamash we mejburiy emgek qatarliq irqiy qirghinchiliq jinayetliride bash tartip bolalmaydighan mes'uliyiti barliqi mölcherlenmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.