Amérika: "Shinjangda kishilik hoquqni depsende qilghan xitay emeldarlirigha tedbir qollinishni oylishiwatimiz"

Muxbirimiz erkin
2019-03-15
Élxet
Pikir
Share
Print

Amérika tashqi ishlar ministirliqi 14‏-mart küni amérikaning Uyghur rayonida kishilik hoquqni depsende qiliwatqan xitay emeldarlirigha nishanliq tedbir qollinishni oylishiwatqanliqini, Uyghur rayonida yüz bériwatqan kishilik hoquq depsendichilikining "Insaniyet üchün éghir nomus" ikenlikini tekitligen.

Amérika tashqi ishlar ministirliqi bayanatchisi robért palladino 14‏-mart ötküzülgen kündilik axbarat yighinida, "Biz bu qilmishni sadir qiliwatqan kishilerning jawabkarliqini sürüshtürimiz. Shuningdek ulargha qarita nishanliq émbargo, nishanliq tedbirlerni qollinimiz" dégen. Palladino amérikaning 2018‏-yilliq kishilik hoquq doklati élan qilinip arqidinla bu sözlerni qilghan.

Amérika tashqi ishlar ministirliqining 13‏-mart küni élan qilin'ghan doklatida Uyghurlarning kishilik hoquq weziyiti nahayiti etrapliq tonushturulghan.

Doklatta, xitayning yighiwélish lagérlirini qurup, Uyghur, qazaq we bashqa musulman milletlerni keng kölemlik qamishidiki meqsiti ularning "Medeniyiti, diniy étiqadini yoqitish" ikenliki tekitlen'gen idi. Roytérsning xewiride tekitlinishiche, robért palladino kéyinrek özining émbargo, dégen sözni xata ishletkenlikini bildürgen. Emma "Nishanliq tedbir qollinimiz" dégen sözining menisige chüshenche bermigen.

U "Dawamliq xitayni rayondiki siyasitige xatime bérishke, xalighanche tutqun qilin'ghan kishilerni qoyup bérishke chaqiridighanliqi" ni bildürgen.

Uning tekitlishiche, u türkiyening yéqinda Uyghur diyari weziyitige bergen bahasi we uning rayonda yüz bériwatqan ishlarni "Insaniyet üchün éghir nomus" dégenlikige nahayiti qayil bolghan. Robért palladino peyshenbe küni yuqiriqi sözlerni qilishtin sel burun xitay hökümiti bayanat élan qilip, amérikaning doklatidiki Uyghur weziyitige da'ir tenqidlerni qattiq sözler bilen keskin ret qilghan idi.

Toluq bet