Американиң муавин пирезидент намзати хитайни “әң чоң тәһдит” дегән

Американиң келәр нөвәтлик пирезидент намзати доналд трамп муавин пирезидентлиққа таллиған җамес давид ванс (J. D Vance)  Йеқинда мухбирларға бәргән җавабида, хитайни америка үчүн әң чоң тәһдит дегән. Бу кәлгүсидә қурулуш еһтимали болған доналд трамп һөкүмитиниң хитайға қаттиқ сиясәт қоллинидиғанлиқидин бешарәт бәргән.

“бломберг хәвәрлири” ториниң бу һәқтә бәргән хәвиригә қариғанда, җамес давид ванс “фокс хәвәрлири” мухбириниң соалға бәргән җавабида, доналд трампниң кәлгүсидә сөһбәт йоли билән украина урушини аяғлаштуридиғанлиқини ейтқан, арқидинла “ мушундақ қилғанда  америка өзиниң диққитини һәқиқий мәсилигә қариталайду, у болсиму хитай мәсилисидур. Хитай бизниң дөлитимиз үчүн әң чоң тәһдиттур, хитай һазир бизниң диққитимизни башқа яққа бураватиду” дегән.

Җамес давид ванс  доналд трампниң хитайдин омумйүзлүк чегра беҗи елиш тәклипини қоллайдиғанлиқини билдүрүп:“ биз хитайдики қул әмгикини җазалаймиз, чүнки хитай ашу нәрсилирини (мәҗбурий әмгәк маллирини) бизгә киргүзүватиду” дегән.  Униң билдүрүшичә, улар хитайға содида етибар беришни тохтитиш вә хитай маллиридин техиму юқири баҗ елиш үчүн бир қанун лайиһәси түзүшни оттуриға қойған болуп, униңда хитай мелидин елинидиған баҗ 60 пирсәнткә йетиши мумкин икән. Иқтисадшунасларниң билдүрүшичә, бу қанун дуня содисини астин-үстүн қиливетидикән; хитайниң омумий ишләпчиқириш қиммити (GDP) ни 2.5 Пирсәнт, йиллиқ иқтисадий ешиш нисбитини 50 пирсәнттин көп төвәнлитидикән.

Хәвәрләрдин мәлум болушичә, пирезидент намзати доналд трамп 13-июл күни қәсткә учрап аман қалғандин кейин уни қоллаш нисбити ашқан; у таллиған муавин пирезидент намзати җамес давид вансму хәлқ арисидин йетишип чиққан сиясәтчи болуп, хитайға қаритилған сиясәттә доналд трамп билән охшаш мәйданда икән. Мәлуматларға қариғанда, у илгири әскәр болған, тиҗарәттә утуқ қазанған, адвокатлиқ қилған, китаб йезип даң қазанған шәхс болуп, 2023-йил америка дөләт мәҗлиси кеңәш палатасиниң әзаси болуп сайланған; 2024-йил муавин пирезидентлиқ намзати болған.