Хитай даирилири борталада олтурушлуқ бир хитай әрздарниң кимлик кинишкисини тартивалған

Хитай даирилири уйғур илиниң бортала областида олтурушлуқ бир хитай әрздар вә паалийәтчиниң кимлик кинишкисини тартивелип, униң әрз қилиш үчүн юрт атлап чиқишини тосқан. Униң чәтәлдики хитай кишилик һоқуқ торлириға билдүрүшичә, 25‏-январ күни кәнт партийә секретари вә алақидар кадирлар униң өйигә бастуруп кирип, кимлик кинишкисини тартивалған.

Җяң җилин 26‏-январ чәтәлдики кишилик һоқуқ торлириға телефон қилип бәргән учурида, “бу кадирлар чаған өткүзүватқанлиқиға қаримай алайитән келип, кимлик кинишкамни булап чиқип кәтти. Уларниң мәқсити мениң сиртқа чиқишимни тосуш вә әркинликимни контрол қилиш” дегән.

Бортала шәһиригә қарашлиқ далерт базири қарамодун кәнтиниң партийә секретари ваң фачи униң кимликини чаған байримидин кейин қайтуруп берилидиғанлиқини билдүргән. Җяң җилинниң билдүрүшичә, қарамодун кәнти партийә 2‏-секретариниң униң өйидә туруп, мәзкур хитай әрздарни көзитип келиватқиниға хели узун вақит болған. Хитай кишилик һоқуқ тор бәтлириниң қәйт қилишичә, әрздар җяң җилин узундин буян виҗдан өктичилирини қоллап келиватқан бир паалийәтчи икән.