Xitay hökümet tori bir xitay eskerning Uyghur élida bir qétimdila 6 ademni étip öltürgenlikini ashkarilighan

Muxbirimiz irade
2021-08-05
Share

Xitayning tengritagh tori 5-awghust küni tarqatqan bir xewiride Uyghur élidiki atalmish “Térrorluqqa qarshi turush” urushida bir xitay eskerning bir qétimdila 6 ademni öltürgenlikini tentene qilghan.

Xewerde bayan qilinishiche, 2011-yili armiyege qatnashqan wu jyaw isimlik bir esker shinjang qoralliq saqchi qisimi alahide heriket etritining mu'awin etret bashliqiliq wezipisini ötigen mezgilide yüz bergen “Zorawan térorluq weqesi” de bir qétimda alte kishini öltürgeniken.

Diqqet qozghaydighini, xitay hökümet tori xewiride yene, wujiyawning qolida qorali bolmighan 6 kishini biwaste qarshilishish bolmay turup so'al-soraqsiz neq meydanda étiwetkenlikini öz aghzi bilen étirap qilghan we uni “Qehrimanliq” dep teswirligen.

Xewerdin qarighanda, u weqe 2014-yili yazda yüz bergen bolup, eyni chaghda alahide heriket birinchi etritige qéchip ketken zorawan térorchilarni qoghlash, qorshash, qolgha élish we yoqitish buyruqi bérilgen. Buning bilen wujiyaw paxta étizliqliridin qéchip kétiwatqan 2 qoralsz kishini neq meydanda miltiq bilen étip öltürgen we arqidinla yene 4 kishini étip öltürgeniken.

Tengritagh tori xewiride, wu jyawning “Men peqet eng yaxshi jeng halitini saqlap, wezipini orundap düshmenni yoqitishni xalaymen” dégenlikini ilgiri sürüp uni “Qehriman esker” dep medhiyligen.

Halbuki, chet'ellerdiki Uyghur közetküchiler xitayning hökümet taratqusida tarqitilghan bu xewerni xitayning Uyghur élidiki atalmish “Térroluqqa qarshi turush” namida yürgüzüwatqan “Sotsiz ölüm”, yeni xitay esker-saqchilirining Uyghurlargha xalighanche oq chiqirip qirip tashlash qilmishlirining polattek pakiti, dep qarimaqta.

Ular yuqiridiki xewerdiki wujiyaw isimlik bu eskerning qilmishlirining kéyinki künlerde xitay hökümitining Uyghur élida yürgüzüwatqan irqiy qirghinchiliq we insaniyetke qarshi jinayetliri üchün polattek pakit bolup qalidighanliqini déyishmekte.

Téxi yéqinda xitayning “Shinjang géziti” xewiride qeshqerdiki “Térrorluqqa qarshi turush xenjiri” dep nam bérilgen bir alahide urush qilish ottura etritining bir qétimliq atalmish “Térorluq weqesi” de 17 neper atalmish “Zorawan térrorchi” ni bir qétimdila étip öltürgenlikini, 121 kishini tutqun qilghanliqini bildürgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet