Xitayda yéza xelqi 8 yashliq eydiz balini yézidin qoghlap chiqirishni telep qilghan

Muxbirimiz irade
2014.12.18
Share on WhatsApp
Share on WhatsApp


Sichu'en ölkisige qarashliq bir yézidiki 200 din oshuq amma birlikte yéziliq hökümetke xet yézip, yézidiki 8 yashliq eydiz yuqumlan'ghuchisi balini qoghlap chiqirishni telep qilghan. Mezkur weqe uchur wastiliri arqiliq tarqalghandin kéyin jem'iyette küchlük inkas qozghidi.

Firansiye agéntliqining xewer qilishiche, bu xetke imza qoyghanlar ichide bu ösmür balining bowisimu bar iken. Künkün isimlik bu bala wirusni apisidin yuqturuwalghan bolup, uning apisi 2006 - yili yézini tashlap chiqip ketken, künkünning dadisimu balisining eydiz ikenlikini uqqandin kéyin uni tashlap “Ghayip” bolup ketken. Künkün mektep yéshigha toshqanda yézidiki bashlan'ghuch mektep uni mektepke qobul qilmighan, yézidiki kishilermu uningdin özini tartip yürgen.

Mezkur weqe, xitaydiki eydiz bimarlirining jem'iyet teripidin yétim qaldurulush, kemsitilishke uchrashtek weziyitining bir tipik misali, dep qaralmaqta. Eydiz bimarlirining hoquqini qoghdash xizmiti bilen shughulliniwatqan ey jishing teshkilatining pa'aliyetchiliridin tang ependi firansiye agéntliqi muxbirigha bundaq kemsitishning xitay puqralirining eydizge bolghan köz qarishining töwenlikidin kélip chiqiwatqanliqini, bolupmu yézilarda kishilerning bu jehette intayin sawatsizliqini bildürgen.

Xitay döletlik sehiye we pilanliq tughut komitéti bu ayning béshida élan qilin'ghan sitatéstikidin qarighanda, xitayda eydiz bilen yuqumlan'ghan dep di'agnoz qoyulghanlarning sani 497 ming neper iken. Derweqe mektep, doxturxana, xizmet orunliri qatarliq hemmila yerde ulargha qaritilghan kemsitish sewebidin eydiz bimarlirigha di'agnoz qoyush we ularni dawalash ishliri qattiq qéyinchiliqqa uchraydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.