Хитайниң ғәрб әллиридики җасуслуқ һәрикәтлири техиму чоң хәтәр вә тәһдит пәйда қилишқа башлиған

Вашингтондин мухбиримиз җәвлан тәйярлиди
2023.10.18

Истихбарат саһәсидә “бәш көз иттипақи” дәп тонулған америка, әнглийә, австралийә, канада вә йеңи зеландийәниң истихбарат әмәлдарлири 10-айниң 17-күни сөһбәт йиғини өткүзүп, хитай җасуслириниң сода мәхпийәтликини оғрилаш қилмишлири һәққидә музакириләшкән.

Әнглийә BBC Ториниң бу һәқтики хәвиригә қариғанда, “бәш көз иттипақи” мәсуллири бу нөвәт тунҗи қетим калифорнийә шитатидики станфорд университетида аммиви сөһбәт елип берип, хитайниң җасуслуқ һәрикәтлириниң тәпсилатини ашкарилиған. Истихбарат әмәлдарлири өзлириниң баянатида, шундақла карханичилар вә мәбләғ салғучилар билән өткүзгән мәхпий йиғинида илғар техникиларниң хитай тәрипидин оғрилиниватқанлиқини билдүргән.

Әнглийә һәрбий истихбарат 5-башқармиси мәсулиниң билдүрүшичә, әнглийә ширкәтлири хитайниң җасуслуқ һуҗумиға учраватқан болуп, хитай җасуслири линкдин (Linkedin) Тор бетидә 20 миң әнглийә пуқраси билән алақә қуруп, уларни сәзгүр учурлар билән тәминләйдиған қилишқа урунған.

Хитай җасуслири әнглийә ширкәтлиридә ишләйдиғанлардин сода мәхпийәтлики вә санлиқ мәлуматларни топлаш билән биргә, сүний әқил техникисидин пайдилинип, үнүмлүк усуллар билән әнглийә сияситигә арилишишқа башлиған.

Бу сөһбәт йиғинида, “бәш көз иттипақи” ниң башқа әзалириму хитай җасуслиридин келиватқан әндишилирини оттуриға қойған. Уларниң билдүрүшичә, хитай һөкүмити җасуслирини ишқа селип, башқа дөләт әмәлдарлириниң пикир-хияли, пиланини билишкә урунидикән, булар әмәлийәттә дөләтниң истратегийәлик пиланлириниң бир қисми һесаблинидикән. Йеқинқи йиллардин бери, хитайниң бу түрдики җасуслуқ һәрикәтлири техиму хәтәрлик вә суйиқәстлик һалға келишкә башлиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.