Xitayning gherb elliridiki jasusluq heriketliri téximu chong xeter we tehdit peyda qilishqa bashlighan

Washin'gtondin muxbirimiz jewlan teyyarlidi
2023.10.18

Istixbarat saheside “Besh köz ittipaqi” dep tonulghan amérika, en'gliye, awstraliye, kanada we yéngi zélandiyening istixbarat emeldarliri 10-ayning 17-küni söhbet yighini ötküzüp, xitay jasuslirining soda mexpiyetlikini oghrilash qilmishliri heqqide muzakirileshken.

En'gliye BBC Torining bu heqtiki xewirige qarighanda, “Besh köz ittipaqi” mes'ulliri bu nöwet tunji qétim kaliforniye shitatidiki stanford uniwérsitétida ammiwi söhbet élip bérip, xitayning jasusluq heriketlirining tepsilatini ashkarilighan. Istixbarat emeldarliri özlirining bayanatida, shundaqla karxanichilar we meblegh salghuchilar bilen ötküzgen mexpiy yighinida ilghar téxnikilarning xitay teripidin oghriliniwatqanliqini bildürgen.

En'gliye herbiy istixbarat 5-bashqarmisi mes'ulining bildürüshiche, en'gliye shirketliri xitayning jasusluq hujumigha uchrawatqan bolup, xitay jasusliri linkdin (Linkedin) Tor bétide 20 ming en'gliye puqrasi bilen alaqe qurup, ularni sezgür uchurlar bilen teminleydighan qilishqa urun'ghan.

Xitay jasusliri en'gliye shirketliride ishleydighanlardin soda mexpiyetliki we sanliq melumatlarni toplash bilen birge, sün'iy eqil téxnikisidin paydilinip, ünümlük usullar bilen en'gliye siyasitige arilishishqa bashlighan.

Bu söhbet yighinida, “Besh köz ittipaqi” ning bashqa ezalirimu xitay jasusliridin kéliwatqan endishilirini otturigha qoyghan. Ularning bildürüshiche, xitay hökümiti jasuslirini ishqa sélip, bashqa dölet emeldarlirining pikir-xiyali, pilanini bilishke urunidiken, bular emeliyette döletning istratégiyelik pilanlirining bir qismi hésablinidiken. Yéqinqi yillardin béri, xitayning bu türdiki jasusluq heriketliri téximu xeterlik we suyiqestlik halgha kélishke bashlighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.