Хитай алтайда терилған гени өзгәртилгән қонақниң чәтәлдин әткәс қилинғанлиқини илгири сүрди

Хитай йеза игилик министирлики йеқинда алтайдин байқалған гени өзгәртилгән қонақниң уруқи чәтәлдин әткәс қилинғанлиқини илгири сүргән. Бу йил 5 - айда бир хитай йеза игилик фирмиси алтайниң бөрүлтоқай наһийисидә гени өзгәртилгән қонақ терип байқилип қалған. Йәрлик йеза игилик тармақлири 100 гектардин артуқ бу қонақлиқни ағдуруп ташлап, мәзкур фирмиға 10 миң сом җәриманә қойған иди.

Хитай йеза игилик министирлиқиниң билдүрүшичә, бу фирма техиму көп пайдини көзләп, гени өзгәртилгән қонақ уруқини әткәс йоллар билән елип киргән. Гени өзгәртилгән зираәтләрниң һәр хил кесәлликләргә қарши имунит күчи күчлүк болғачқа, у хитай йеза игилик ширкитини җәлп қилған.

Әмма хитай гени өзгәртилгән асаслиқ зираәтләрни тиҗарәт характерлик ишләпчиришни чәклигән болуп, у пәқәт гени өзгәртилгән пахта билән папаяға йол қойиду. Хитай “йәршари вақти гезити”ниң хәвәр қилишичә, хитай йеза игилик пәнләр академийисиниң тәтқиқатчиси хуаң дафаң, гени өзгәртилгән қонақниң бихәтәрлик көздә тутуп чәкләнмәйдиғанлиқи, уни қанунсиз өстүрүш базарни қалаймиқанлаштуруп, бу саһәдики тәтқиқатқа тосқунлуқ қилидиғанлиқи үчүн чәклинидиғанлиқини билдүргән.

Көзәткүчиләрниң илгири сүрүшичә, хитай һөкүмити гени өзгәртилгән зираәтләрни чәклисиму, әмма хитай гени өзгәртилгән йеза игилик мәһсулатлирини әң көп импорт қилидиған дөләт икән.