Xitay altayda térilghan géni özgertilgen qonaqning chet'eldin etkes qilin'ghanliqini ilgiri sürdi

Muxbirimiz erkin
2016-09-12
Share

Xitay yéza igilik ministirliki yéqinda altaydin bayqalghan géni özgertilgen qonaqning uruqi chet'eldin etkes qilin'ghanliqini ilgiri sürgen. Bu yil 5 - ayda bir xitay yéza igilik firmisi altayning börültoqay nahiyiside géni özgertilgen qonaq térip bayqilip qalghan. Yerlik yéza igilik tarmaqliri 100 géktardin artuq bu qonaqliqni aghdurup tashlap, mezkur firmigha 10 ming som jerimane qoyghan idi.

Xitay yéza igilik ministirliqining bildürüshiche, bu firma téximu köp paydini közlep, géni özgertilgen qonaq uruqini etkes yollar bilen élip kirgen. Géni özgertilgen zira'etlerning her xil késelliklerge qarshi imunit küchi küchlük bolghachqa, u xitay yéza igilik shirkitini jelp qilghan.

Emma xitay géni özgertilgen asasliq zira'etlerni tijaret xaraktérlik ishlepchirishni chekligen bolup, u peqet géni özgertilgen paxta bilen papayagha yol qoyidu. Xitay “Yershari waqti géziti”ning xewer qilishiche, xitay yéza igilik penler akadémiyisining tetqiqatchisi xu'ang dafang, géni özgertilgen qonaqning bixeterlik közde tutup cheklenmeydighanliqi, uni qanunsiz östürüsh bazarni qalaymiqanlashturup, bu sahediki tetqiqatqa tosqunluq qilidighanliqi üchün cheklinidighanliqini bildürgen.

Közetküchilerning ilgiri sürüshiche, xitay hökümiti géni özgertilgen zira'etlerni cheklisimu, emma xitay géni özgertilgen yéza igilik mehsulatlirini eng köp import qilidighan dölet iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet