Хитайда “һалал” лиқ һәққидики чүшәнчиләрни чәкләш шамили баш көтүрмәктә

Алақидар учур мәнбәлириниң қәйт қилишичә, уйғурлар диярида “һалал” бәлгилириниң чәклиниши йолға қоюлғандин кейин, “һалал” лиқ һәққидики вәһимә вә “һалал” лиқни чәкләш тәшәббуслири хитайниң ичкири өлкилиридики бир қисим җайларда баш көтүрүватқанлиқи мәлум.

“вейбо”, “сина” қатарлиқ иҗтимаий мунбәрләрдики инкасларға қариғанда, хитайдики чоң университетлардин болған йәнтәй университетиниң мусулманчә оқуғучилар ашханисини туңганлар көтүрә еливалғандин кейин, ашханиниң залиға мәсчитләрниң рәңлик сүрити, “қуран” вә “һәдис” ләрдин талланма җүмлиләрни чаплиған икән. Шуниң билән биргә ашханиниң ичидики китаб ишкапиға “немә үчүн мусулманлар һарақ ичмәйду?”, “немә үчүн мусулманлар чошқа гөши йемәйду?” дегәндәк мавзулардики сават характерлик китабларни тизип қойған икән. Әмма йеқиндин буян алақидар тармақлар мусулманлар ашханисидики бу һадисиләрни “оқутқучи вә оқуғучиларға ислам динини тарқитишқа урунғанлиқ”, дәп әйиблигән. Шундақла маарипниң дин билән қариму-қарши икәнликини әслитип, “мәктәп қоруси диний тәшвиқат паалийәтлирини қәтий тосуши лазим”, дәп тәкитлигән.

Оқурмәнләр тәминлигән йәнә бир учурда көрситилишичә, сичүән өлкисиниң чеңду шәһиридики бир даңлиқ ресторан ашкара уқтуруш чиқирип, “юқири дәриҗилик дөләт органлириниң тәлипи һәмдә базардики һалал мәһсулатларни йоқитиш һәрикитиниң роһиға бинаән һалал бәлгилирини бундин кейин ишләтмәсликни қарар қилдуқ”, дегән.