Японийә хитайдин һава мудапиә районини дәрһал бикар қилишни тәләп қилди

Японийә һөкүмити чаршәнбә күни хитайдин униң шәрқий деңиз һава мудапиә кимлик районини дәрһал бикар қилишни тәләп қилған.

Шуниң билән биргә, японийә һава йоллири ширкәтлири чаршәнбә күндин башлап, хитайниң һава мудапиә кимлик районидин учуп өткәндә униңға өзиниң учуш йөлинишини мәлум қилмайдиғанлиқини елан қилған.

Хитай дөләт мудапиә министирлиқи өткән шәнбә сенкаку араллирини өз ичигә алған шәрқий деңиз һава бошлуқини мудапиә кимлик райони, дәп елан қилип, бу районға киргән һәрқандақ чәтәл айропиланлириниң өзини мәлум қилишини тәләп қилған. Мәлум қилмиса, мудапиә характерлик тәдбир алидиғанлиқини билдүргән иди.

Японийә дөләт мудапиә вәзири онудера чаршәнбә күни: биз буни пүтүнләй қобул қилмаймиз. Хитайниң һава мудапиә кимлик районини дәрһал бикар қилишини үмид қилимиз. Ишинимәнки, америка охшаш пикирдә, дегән.

Хитай дүшәнбә күни һава мудапиә кимлик районини елан қилип әтиси америкиниң 2 данә б-52 бәлгилик истратегийилик бомбардиманчи айропилани бу райондин учуп өткән. Хитай буниңға һечқандақ мудапиә тәдбири қолланмиған иди.

Бәш бурҗәклик бинаниң ашкарилишичә, америка дөләт мудапиә министири чак һейгел, сенкаку қатарлиқ японийә-хитай оттурисида ихтилаптики бәзи аралларниң америка-японийә бихәтәрлик шәртнамисигә асасән қоғдилидиғанлиқини билдүргән.