Xitayda “Langya hénipa wirus” namliq yéngi wirus yuqumdarliri bayqalghan

Yéqinda xitay taratqulirida keng tarqalghan bir xewerge asaslan'ghanda, xitayning shendung we xénen ölkiside “Langya hénipa wirus” (Langya henipa virus, LayV) namliq yéngi bir wirus bilen yuqumlan'ghan 35 adem bayqalghan.

Xewerde éytilishiche, “Langya hénipa wirusi” namliq bu wirus, nipa wirusi qatarliq bir nechche wiruslarni öz ichige alidiken. Nipa wirusning janni élish xetiri 75 pirsent bolup, hazirqi tajsiman wirustin nechche hesse küchlük iken. Bu wirus eng deslepte malaysiyadiki choshqa baqquchi déhqanlarda körülgen bolup, kéyin filippin, bangladésh, hindistan qatarliq döletlerge yamrap, nurghun adem ölgen.

Dunya sehiye teshkilati 2018-yil nipa wirusini dunyadiki eng xeterlik yuqumlarning biri dep békitken. Bu wirus bilen yuqumlan'ghuchilarning yoshurun mezgili 4 kündin 14 kün'giche bolidiken, deslepte yuqumluq zukamgha oxshash qizish, bash aghrish, gal aghrish, qusush alametliri körülidiken؛ éghir bolghanlirida, ménge yallughi we tutqaqliq peyda bolidiken؛ köpinche yuqumdarlar 3 kündin 14 kün'giche ölüp kétidiken.

Shendung bilen xénende bayqalghan 35 yuqumdarda tekshürülgen langya hénipa wirusi gerche nipa wirusidek küchlük bolmisimu, emma bir türdiki wiruslardin bolup, choshqa, it we müshüklermu bu wirusni élip yüreleydiken we ademlerge yuqturalaydiken. Yuqiriqi 35 yuqumdar ichide 26 ademning ehwali éghir bolsimu, hazirghiche birersining ölgenliki heqqide héchqandaq melumat bérilmigen.

Nöwette Uyghur rayonida késellik alamiti yoq tajsiman wirus yuqumdarliri köpiyiwatqan bolup, ili oblastida yamrighan wirusni gensudin kelgenlerning yuqturghanliqi radiyomiz teripidin delillen'genidi. Shendung bilen xénende bayqalghan bu yéngi wirusning bashqa wiruslargha oxshashla Uyghur rayonigha yamrash éhtimalining barliqi hazir endishe qozghawatqan mesililerning biri bolup turmaqta.