Shi jinping xitay armiyesini dunyada birinchi orunda turidighan armiye qilip qurup chiqishni tekitligen

Xitay dölet re'isi shi jinping xitay armiyesini dunyada birinchi orunda turidighan armiye qilip qurup chiqishni tézlitishni tekitligen.

Xitay dölet re'isi shi jinping bu sözni 8-mart küni, xitayning 14-nöwetlik memliketlik xelq qurultiyi 1-yighini mezgilide azadliq armiye we qoralliq saqchi qisim wekiller ömikining omumiy yighinigha qatnashqanda qilghan. U shu kündiki sözide yéngi weziyet, yéngi wezipilerge asasen békitip chiqilghan bir gewdileshken dölet istratégiye sistémisi we iqtidarini mustehkemleshtin ibaret istratégiyelik pilan üstide toxtalghan. U sözide “Bu pilanni izchillashturush we emeliyleshtürüsh jungxu'a millitining ulugh güllinishini omumyüzlük algha siljitish, armiye qurulghanliqining 100 yilliq küresh nishanini ishqa ashurush we xitay xelq azadliq armiyesini dunyada birinchi qatarda turidighan armiye qilip qurup chiqishni tézlitishte intayin muhim ehmiyetke ige” dégen.

Biraq xewerde, bu yéngi weziyetke asasen békitip chiqilghan istratégiye pilanining tepsilati déyilmigen.

Amérika-xitay munasiwetliri nöwette xitayning amérikagha jasusluq shari ewetishi, teywenni toxtimay tehdit qilishi we rusiyening ukra'inagha qaratqan tajawuzchiliqini qollishidek sewebler tüpeylidin nechche on yildin buyanqi eng nachar sewiyede turmaqta.

Xitay dölet re'isi shi jinping aldinqi kündiki sözide amérikaning ismini ochuq tilgha élip turup: “Amérika bizning tereqqiyatimizni her tereptin cheklewatidu” dep eyibligenidi. Arqidinla xitay tashqi ishlar ministiri chin gang amérika eger xitaygha tutqan mu'amilisini özgertmise, aqiwiti éghir bolidu,” dep söz qilghan.

Mushundaq bir peytte, xitay dölet re'isi shi jinpingning xitay armiyesini dunyada 1-orunda turidighan armiye qilip qurup chiqishni tekitlishi xelq'araliq axbaratlarning küchlük diqqitini qozghidi.