Хитайниң интернет гуруһи вәкиллири өмики “шинҗаңға ярдәм бериш” вәдисини билдүрди

Вашингтондин мухбиримиз җәвлан тәйярлиди
2024.08.14

Хитайниң тор таратқулири вә тор содисида йетәкчи орунда туруватқан соху, әйчийи, җиңдуң, мейтуән қатарлиқ ширкәт гуруһлириниң вәкиллири 13-авғуст уйғур елигә “қизил макан шинҗаң саяһити” үчүн кәлгән. Ма шиңрүй, әркин тунияз қатарлиқлар уларни күтүвелип, сөһбәт өткүзгән.

Хитайниң “тәңритағ тори”, “шинҗаң гезити” тори чиқарған бу хәвәрдә, ма шиңрүйниң вәкилләргә сөзлигән сөзиниң қисқичә мәзмуни берилгән. Ма шиңрүй уларға ши җинпиңниң сөзини нәқил кәлтүрүп, “шинҗаңниң пүтүн мәмликәттики истратегийәлик орни интайин муһим. Шуңа силәрму шинҗаңниң муқимлиқини сақлашқа, униң юқири сүпәтлик тәрәққиятини илгири сүрүшкә вә һәр милләт хәлқигә хитай мәдәнийитини сиңдүрүшкә ярдәм бериңлар” дегән нуқтини тәкитлигән.

Ма шиңрүй нөвәттә тор дунясиниң тәшвиқат вә сода җәһәттики тәңдашсиз күчини, униң кәлгүсидә уйғур елидики тәрәққиятни илгири сүрүштә ойнайдиған ролини муәййәнләштүрүш билән биргә, хитайдики чоң интернет ширкәтлириниң уйғур елидиму өз кәспини тәрәққий қилдурушини, “шәрқтә соққан чотни ғәрбтә әмәлийләштүрүш, шинҗаңни мәдәнийәт арқилиқ озуқландуруш, шинҗаңниң есил мәһсулатлирини дуняға йүзләндүрүш, шинҗаң саяһәтчиликини гүлләндүрүш, шинҗаң һекайисини яхши сөзләш” үчүн һәссә қошушини үмид қилидиғанлиқини билдүргән.

Тор ширкити гуруһи вәкиллириму узундин буян уйғур елигә мәбләғ селишни көпәйткәнликини, ортақ мәнпәәт вә өзара һәмкарлиқ асасида бу райондики тор содиси вә “мәдәнийәт тәрәққияти” ни давамлиқ илгири сүридиғанлиқини билдүрүшкән.

Мәлум болушичә, интернет барлиққа кәлгәндин буян, хитай шималий корейә, иран қатарлиқ дөләтләргә охшаш өз пуқралириға тор чәклимиси қоюп кәлгән дөләтләрдин бири болуп кәлгән. Хитайда һазир тәхминән 710 милйон киши тордин пайдилинидикән, хитай 2016-йилила “тор бихәтәрлик қануни” ни елан қилған болуп, уйғур елидә VPN түридики тамдин атлаш әплирини ишләткәнләрни “2-дәриҗилик террорлуқ” җинайити билән әйиблигәнлики, һәтта хитай ширкәтлири чиқарған “Kuaiya” (куәйя) әп деталини ишләткәнләрни тутуп түрмә-лагерларға солиғанлиқи радийомиз тәрипидин ениқланғаниди. Хитайниң йәнә 2017-йилдин башлап уйғурларни кәң көләмлик тутушта ишләткән “бир туташ башқуруш суписи” ға хитайдики чоң тор ширкәтлириниң техника җәһәттә ярдәм бәргәнлики мәлум.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.