Уйғур ели баһар пәслидә хитайдин 561 "ихтисас игиси" әкәлгән

Мухбиримиз җүмә
2017-04-22
Share


Уйғур аптоном райони бу йил баһар пәслидә хитай өлкилиридин 561 "ихтисас игиси" әкәлгән.

Сина ториниң "үрүмчи астанә сәһәр гезити" ниң хәвәрдин нәқил хәвәр қилишичә, уйғур аптоном районлуқ адәм күчи байлиқи вә иҗтимаий капаләт назарити бу хадимларниң ичкиридики нуқтилиқ мәктәпләрни пүттүргән аалмиш "ихтисас игилири" икәнликини билдүргән.

Хәвәрдә көрситилишичә, булар районниң иҗтимаий иқтисадий тәрәққиятида ихтисаслиқлар җиддий кәм болуш бошлуқини толдуруш үчүн елип келингән.

Булар хитайниң чиңхуа, фудән, вә шиән қатнаш университети қатарлиқ мәктәпләрни пүттүргәнләр икән.

Булар аптоном районлуқ интизам тәкшүрүш комитети, аптоном районлуқ ислаһат комитети, иҗтимаий пәнләр академийәси қатарлиқ һөкүмәт органлири, ғулҗа, қарамай қатарлиқ шәһәрләрдики кәспий вә һөкүмәт органлириға орунлаштурулған.

Алий мәктәпләрни пүттүргән уйғур яшлириниңму хизмәт тепишта қийниливатқанлиқи илгири сориливатқан пәйтләрдә, уйғур аптоном районлуқ адәм күчи байлиқи вә иҗтимаий капаләт назарити бу айниң бешидики бир парчә хәвиридә 2017-йили уйғур елигә 30 миңға йеқин ихтисаслиқ хадим җиддий еһтияҗлиқ икәнлики ашкарилиған.

Әмма бу хизмәт пурсәтлиридин йәрликләрниң бәһримән қилинидиған яки қилинмайдиғанлиқи һазирчә намәлум.

Уйғур алий мәктәп оқуғучилириниң ишсиз қелиш мәсилиси уйғур елидә барғанчә еғирлишиватқан мәсилиләрниң бири иди. Радиомиз алдинқи йили қарамай шәһириниң өзидила 5 миңдин артуқ алий мәктәпни пүттүрүп ишсиз йүргән уйғур вә қазақ оқуғучиларниң барлиқини хәвәр қилған.

Мәлум болушичә, хитай даирилири бу оқуғучиларниң ата-анилириниң әрз тәләплиригә қулақ салмиған икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт