Xitayda tawar we mulazimet qimmitining chüshüshi xitay iqtisadi üchün téximu éghir mesililerning signali, dep qaralmaqta

“Birleshme agéntliq” ning 4-marttiki xewirige asaslan'ghanda, xitay dunyaning bashqa jaylirida keng da'iride mewjut bolghan pul paxalliqining bésimigha duch kelgen. Mutexessislerning qarishiche, xitaydiki pul paxalliqi iqtisadi éshishning toxtap qalghanliqining alamiti iken.

Mezkur xewerde mundaq déyilgen: “Iqtisadni omumlashturghanda, tawar we mulazimet qimmiti 2023- we 2024-yilliri chüshti. Bu 1960-yildin buyanqi eng uzun pul paxalliqini keltürüp chiqardi. Iqtisadtiki baha özgirishining eng keng ölchimi bolghan ishlepchiqirish omumiy qimmitidiki pul paxalliqi, aldinqi pesildiki 0.5- Pirsentke sélishturghanda 2024-yilining axirqi üch éyida 0.8- Pirsentke chüshüp qaldi”.

Xitay hökümiti yéqinda mewjut bolghan pul paxalliqining aldini élish, shundaqla qiyin ehwalda qalghan xitay iqtisadi we donald trampning amérika-xitay munasiwitide yéngi soda urushini otturigha chiqirish mumkinchilikige qarita yéngi qarar maqullighan idi. Xitay hökümiti xitaydiki yerlik hökümetlerning ghayet zor qerzni tölishige yardem bérish üchün, bir tirilliyon 400 milyard dollarliq iqtisadni righbetlendürüsh pirogrammisini jakarlighan idi.

Halbuki, amérikidiki “Rend siyaset tetqiqat merkizi” istratégiye we xewpsizlik mutexessisi raymond ko xitay hökümiti élan qilghan iqtisadni righbetlendürüsh pirogrammisining qiyin ehwalda qalghan xitay iqtisadini qutulduralmaydighanliqini, eksiche xitayda körülüwatqan mesililerni téximu éghirlashturuwétidighanliqini ilgiri sürüp, mundaq dégen idi: “Iqtisadni righbetlendürüshke ajritilghan bir tirilliyon 400 milyard dollarliq meblegh yerlik hökümetlerning qerzni qayta pilanlap tölishige purset yaritip bérishni meqset qilghan. Bu yerlik hökümetlerge paydiliq bir pirogramma bolsimu, emma méningche xitaydiki eng négizlik mesile istémalgha tayan'ghan iqtisadiy tereqqiyattur”.