Хитайдики чәтәл мәблиғи 2015-йилидин буянқи әң төвән сәвийәгә чүшүп қалған

Вашингтондин мухбиримиз ирадә тәйярлиди
2023.12.29

“пул-муамилә вақит гезити” ниң хәвәр қилишичә, хитайдики чәтәл мәблиғи 2015-йилидин буянқи әң төвән сәвийәгә чүшүп қалған.

“пул-муамилә вақит гезити” (Financial Times) ниң хоңкоң пай чекидики санлиқ мәлуматларни анализ қилишичә, бу йил чәтәллик мәбләғ салғучиларниң хитайниң пейиға салған сап мәблиғи %87 төвәнләп, 30 милярд 700 милйон йүәнгә чүшүп қалған. Демәкки, 2023-йили чәтәллик мәбләғ салғучилар тәхминән 29 милярд долларни хитай пай базиридин чиқиривалған.

Хәвәрдә дейилишичә, мәбләғ салғучиларниң чекинип чиқишиға асаслиқи хитайниң өй-мүлүк саһәсидики киризис, зор қәрз, төвән истемал тәлипи вә қаттиқ ковид юқумидин кейинки иқтисадини әслигә кәлтүрүп болалмаслиқидәк амиллар сәвәб болған икән. Болупму хитайниң әң чоң өй-мүлүк зәрдарлириниң бири болған “дөләт бағчиси” гуруһиниң бу йил авғустта банка қәрзини төлийәлмәслики киризисниң интайин чоңқурлуқини ашкарилап қойған болуп, мана бу вәқәдин кейин чәтәллик мәбләғ салғучилар хитайдики пайлирини көпләп сетишқа башлиған.

Буниңда йәнә, хитайниң кейинки йилларда чәтәл ширкәтлиригә қилған зомигәрлик сиясәтлириниңму түрткиси болған икән.

Мәлум болушичә, 29-декабир җүмә күни йәнә, хитай һөкүмити тиҗарий саһәни контрол қилидиған техиму қаттиқ қаидиләрни елан қилған болуп, буму өз нөвитидә йәнә нурғун кишиләрниң хитайниң теңшүн, NetEase вә Bilibili қатарлиқ ширкәтлиридики пайлирини сетиветишигә, нәтиҗидә бу ширкәтләрниң пай чекиниң чүшүп кетишигә сәвәб болған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.